სომხეთის პარლამენტის ხუთი ყველაზე აქტიური დეპუტატი ოპოზიციონერია

სომხეთის ახლახან არჩეულ პარლამენტში ყველაზე ხშირად ხუთი ოპოზიციური დეპუტატი გამოდიოდა. ვებგვერდმა „Parliament monitoring“ გამოკვლევა ჩაატარა და იმ დეპუტატების სამი თვის მუშაობის შედეგები განაზოგადა, რომლებიც ეროვნულ საკრებულოში 2017 წლის 2 აპრილს ჩატარებული საპარლამენტო არჩევნების შედეგად მოხვდნენ.

მონიტორინგის შედეგების მიხედვით, ყველაზე აქტიური პარლამენტარების ხუთეულში ფრაქცია „ელკის“ სამი წევრი მოხვდა:

• არტაკ ზეინალიანი – 65 გამოსვლა;
• ნიკოლ პაშინიანი – 64 გამოსვლა;
• მანე  თანდილიანი – 34 გამოსვლა.

ორი დანარჩენი დეპუტატი – ფრაქცია „ცარუკიანიდან“ არის:

• მიქაელ მელქუმიანი – 43-ჯერ გამოვიდა;
• სერგეი ბაგრატიანი – 38-ჯერ.

JAMnews-სთან საუბრისას პოლიტიკურმა ტექნოლოგმა ვიგენ აკოფიანმა აღნიშნა, რომ საპარლამენტო ოპოზიციის აქტიურობა ბუნებრივია, რადგან ეს მისთვის ქვეყნის მოსახლეობასთან ურთიერთობის ერთადერთი სივრცეა.

„გონიერი“ ოპოზიცია ამომრჩევლებთან  კავშირის შესანარჩუნებლად ცდილობს, მაქსიმალურად გამოიყენოს პარლამენტი, რათა მომვალ ამომრჩევლებს დაუმტკიცოს, რომ ხმა მას უნდა მისცენ. მაგრამ არ უნდა დაგვავიწყდეს, რომ რაციონალურ ელემენტებს ყველა გამოსვლა არ შეიცავს. ასე რომ, რაოდენობა ხარისხს არ განაპირობებს. მათი გამოსვლები უფრო PR-ზეა ორიენტირებული, თუმცა პოლიტიკაში PR ცუდი სულაც არ არის“, – თქვა ვიგენ აკოპიანმა.

ვიგენ აკოპიანის აზრით, ხელისუფლება ძირითადად არჩევნების წინ აქტიურდება, დანარჩენი დროის განმავლობაში კი მათ პოზიციას ამისთვის განკუთვნილი ადამიანები გამოთქვამენ ხოლმე.

„ნებისმიერ შემთხვევაში, ნორმალური არ არის, რომ პირველ ხუთეულში ხელისუფლებიდან არავინაა. შესაძლოა, მათ ხელისუფლების პოზიციის გამომხატველი ადამიანები – speaker-ები არ ჰყოფნით. გარდა ამისა, სახელისუფლებო სეგმენტში არიან დეპუტატები, რომლებსაც ორი წინადადების გადაბმა არ შეუძლიათ, და ამიტომაც არ გამოდიან სიტყვით“, – ამბობს აკოპიანი.

პოლიტტექნოლოგს მიაჩნია, რომ ბლოკ „ცარუკიანს“ პიარისთვის გამოსვლები კიდევ უფრო მეტად ესაჭიროება, რადგან ამ ფრაქციის ოპოზიციურობაში ბევრს ეჭვი ეპარება:

 „ამ ფრაქციაში მიესალმებიან სიტყვით გამოსვლებს, კითხვების დასმას, მათ იმის ჩვენება სურთ, რომ იქ ტყუილად კი არ სხედან, არამედ საქმეში ერკვევიან“.

ამავდროულად მათ მიაჩნიათ, რომ ოპოზიციის შემთხვევაში, პარლამენტში გამოსვლები გამართლებულია, რადგან მათ ზემოქმედების სხვა ბერკეტები არ გააჩნიათ.

იმავე ვებგვერდის  „Parliament monitoring“-ის მონაცემებით, ყველაზე ხშირად პარლამენტის სხდომებს ფრაქცია „ცარუკიანის“ წევრები არ ესწრებიან.

პირველ ადგილას არის ფრაქციის ხელმძღვანელი, ბიზნესმენი გაგიკ ცარუკიანი: მას 137 კენჭისყრაში არ აქვს მიღებული მონაწილეობა. მას მოსდევს იმავე ფრაქციის დეპუტატი ნორა არუსტამიანი, რომელსაც 79 კენჭისყრა აქვს გაცდენილი. მესამე ადგილზეა  მმართველი უმრავლესობის დეპუტატი სამველ ფარმანიანი, რომელიც 76 კენჭისყრას არ ესწრებოდა. შემდეგია „ფრაქცია „ცარუკიანის“ დეპუტატი იშხან ზაქარიანი (71 გაცდენა) და სომხეთის რევოლუციური ფრონტი „დაშნაკცუტიუნის“ დეპუტატი აგვან ვარდანიანი (58 გაცდენა).