2017 წელს სომხეთში ბოტულიზმის 12 შემთხვევა დარეგისტრირდა, გარდაცვლილია ერთი ადამიანი

2017 წელს სომხეთში დარეგისტრირდა საკვებით მოწამვლის – ბოტულიზმის 12 მძიმე შემთხვევა. ერთ-ერთი მოწამლულთაგანი გარდაიცვალა, – იტყობინება ჯანდაცვის სამინისტრო.

არმავირის, ტავუშის, არარატის და ვაიოც ძორის მაცხოვრებლები სახლის პირობებში მომზადებული კიტრის და წიწაკის წნილით, ასევე დაკონსერვებული პომიდორებით მოიწამლნენ.

დაავადების სიმპტომები შეიძლება საკვების მიღებიდან 2-3 საათში გამოვლინდეს, ან 12 დღის განმავლობაში. მოწამლულს შეიძლება აღენიშნებოდეს – გულის რევის შეგრძნება, პირღებინება, დიარეა ან ყაბზობა, თვბრუსხვევა, პირის სიმშრალე, მხედველობის, მეტყველების და სუნთქვის პრობლემა, თვალებში გაორება, ქუთუთოების მოდუნება, თვალის კაკლების გადიდება, ხმის ტემბრის შეცვლა, გულის მუშაობის შენელება, ინსულტი.

ჯანდაცვის სამინისტრო იუწყება, რომ ბოტულიზმის პროფილაქტიკისთვის აუცილებელია:

• მოვერიდოთ შინაურ პირობებში დამზადებულ დაკონსერვებულ პროდუქტებს;

• დავაკონსერვოთ პროდუქტები გაყინვის, გაშრობის ან დამარილების გზით;

• შინაურული წესით დამზადებული კონსერვები გამოყენებამდე თერმულად დავამუშავოთ, ანუ ვადუღოთ 20-25 წუთის განმავლობაში;
• არ შევიძინოთ შინაურულად დამზადებული კონსერვები ბაზარში, უცხოებისგან;

• პირველივე სიმპტომების გამოვლენისთანავე მივმართოთ ექიმს.