გამყრელიძე: 2-3 კვირაში შესაძლოა ათასობით ადამიანი დაავადდეს, გვექნება დანაკარგიც

covid-19-ით დაავადებული ადამიანების რიცხვი საქართველოში 300-ს გადასცდა. დაავადებათა კონტროლის ეროვნული ცენტრის გენერალური დირექტორი, ამირან გამყრელიძე აცხადებს, რომ მომავალი 2-3 კვირა ქვეყნისთვის ძალიან მძიმე იქნება და თუ ხალხი სოციალურ დისტანციას არ დაიცავს, კორონავირუსით ათასობით ადამიანი დაინფიცირდება.

15 აპრილის 10:00 საათისთვის, საქართველოში კორონავირუსით ინფიცირების 306 შემთხვევაა დადასტურებული. კარანტინის რეჟიმშია 4990 ადამიანი, ხოლო სტაციონარში მეთვალყურეობის ქვეშ – 462 პირი. კორონავირუსით ინფიცირებულთაგან 69 გამოჯანმრთელდა და 3 გარდაიცვალა. 

კორონავირუსი დაუდგინდა ბოლნისის სასწრაფო დახმარების ბრიგადის 5 წევრს. covid-19 დაუდასტურდა ქობულეთის სამედიცინო ცენტრის ექიმსაც, რომელმაც მაღალი სიცხით ფოთის ცხელების ცენტრს მიმართა. კორონავირუსი დაუდასტურდა ექთანსაც, რომელიც მასთან ერთად მუშაობდა. კასპის მუნიციპალიტეტის სოფელი ხოვლე კი შესაძლოა, დაიკეტოს – იქ საპატრიარქოს დაცვის თანამშრომელი ცხოვრობს, რომელსაც კორონავირუსი დაუდგინდა და რომელსაც, როგორც გაირკვა, თანასოფლელებთან კონტაქტი ჰქონდა. 

თამაში ცეცხლთან: აპრილის ბოლოს ინფიცირების რამდენიმე ათასი შემთხვევა გვექნება, გვექნება დანაკარგები

დაავადებათა კონტროლის ეროვნული ცენტრის გენერალური  დირექტორი ამირან გამყრელიძე აცხადებს, რომ თბილისში ისევ დიდი მოძრაობაა, ქალაქში ბევრი მანქანა დადის, ხალხი ისევ იკრიბება და არც სოციალურ დისტანციას იცავს, რაც მისი შეფასებით ცეცხლთან თამაშია. 

„თუ ჩვენ მოვადუნეთ დღეს სოციალური დისტანცირება და არ დავიცავით საგანგებო მდგომარეობით განსაზღვრული რეგულაციები, იცოდეთ, რომ აპრილის ბოლოს, მაისის პირველ დეკადაში, ქვეყანაში რამდენიმე ათასი შემთხვევა გვექნება. იანგარიშეთ, რომ 20-30%-ს დასჭირდება ინტენსიური თერაპია და რეანიმაციული ღონისძიებები, რომელიც საკმაოდ მძიმე ტვირთი იქნება ჯანდაცვის სისტემისთვის და, სამწუხაროდ, გვექნება დანაკარგები,“ – ამბობს ამირან გამყრელიძე.

კორონავირუსის პანდემიის შეჩერების მიზნით, ხელისუფლებამ მთელი რიგი აკრძალვები შემოიღო: 21 მარტს საგანგებო ვითარება გამოცხადდა, 31 მარტიდან კი საქართველოს მთელს ტერიტორიაზე კომენდანტის საათი ამოქმედდა. ახლა მთავრობა პრეზიდენტისგან და პარლამენტისგან საგანგებო მდგომარეობის 10 მაისამდე გახანგრძლივებას ითხოვს. 15 აპრილის 21 საათიდან კი თბილისში, ბათუმში, ქუთაისსა და რუსთავში ყველა სახის ტრანსპორტის შესვლა და გამოსვლა აიკრძალება. 

მთავრობა სააღდგომოდ საქართველოს მასშტაბით სასაფლაოებზე გასვლის აკრძალვასაც განიხილავს.

ერთადერთი ინსტიტუცია, რომელიც ღიად ამბობს, რომ საგანგებო მდგომარეობის ფარგლებში შემოღებულ წესებს და აკრძალვებს არ დაემორჩილება, საქართველოს საპატრიარქოა. მაღალი რანგის სასულიერო პირები ღიად აცხადებენ, რომ კომენდანტის საათის მიუხედავად, 19 აპრილს, აღდგომის ღამეს, ლიტურგია მრევლის თანდასწრებით ჩატარდება და არც ერთი კოვზით ზიარების წესი შეიცვლება. 

საზოგადოების ნაწილი ახალ შეზღუდვებს აპროტესტებს

ახალი შეზღუდვების დაწესებას, მაშინ როცა ეკლესიებში ხალხი ისევ იკრიბება, პოლიტიკოსების და საზოგადოების ნაწილის მხრიდან პროტესტი მოჰყვა.  

“ადამიანებს რომ გამოვკეტავთ სახლში, ამ სახლში გამოკეტილმა ადამიანებმა რა ჭამონ? ხელისუფლება ვერ ბედავს ჩამოაყალიბოს მკაფიოდ თავისი მოთხოვნები მსხვილი ინსტიტუტების მიმართ, სამაგიეროდ ხელისუფლება ბედავს 70 წელს გადაცილებული და პურის ფულის საშოვნელად გამოსული ტიტების გამყიდველი ადამიანის დაჯარიმებას,” – ამბობს ტელეკომპანია მთავართან საუბარში “ევროპული საქართველოს” წევრი აკაკი ბობოხიძე. 

“შემეშინდა… ვერ ვიძინებ. ვღელავ. დღეს არ იყო კარგი დღე. ბევრი დაინფიცირებულია ერთი დღისთვის. კიდევ გაიზრდება. დღეს, პირველად ვიგრძენი შიში, რადგან მივხვდი, რომ მთავრობა არ ჩაერევა და ვერ უმკლავდება ეკლესიას. აი, ახლა ვიგრძენი შიში – როცა თითქოს დავრჩი მარტო სახლში და ისევ ადამიანების არჩევანზე დადგა საქმე – გავიდეთ თუ არ გავიდეთ გარეთ,“  – წერს სოციალური ქსელის ერთ-ერთი მომხმარებელი. 

• კორონავირუსი უკვე ეკლესიაშია. რას აპირებს საპატრიარქო სააღდგომოდ?
• თბილისი, რუსთავი, ბათუმი და ქუთაისი იკეტება
• ახლობლები რომ მირეკავდნენ, ზოგს ეტირებოდა – რას ჰყვება კორონავირუსით ინფიცირებული სტუდენტი
• კორონავირუსი ჩრდილოეთ კავკასიაში: ინფიცირებულია ყველა რეგიონი, გარდაიცვალა ინგუშეთის მთავარი მუფთი

კორონავირუსის პანდემიის შეჩერების მიზნით საქართველოში 21 მარტს საგანგებო ვითარება გამოცხადდა, 31 მარტიდან კი საქართველოს მთელს ტერიტორიაზე კომენდანტის საათი ამოქმედდა. კორონავირუსის პანდემიის გავრცელების შეჩერების მიზნით, მარნეულში, ბოლნისში, ლენტეხში და ქობულეთის მუნიციპალიტეტის სოფლებში: გვარაში, მუხაესტატეში, ლეღვასა და წყავრუკაში კარანტინი გამოცხადდა.