165 ახალი შემთხვევა - ვირუსი უკვე საქართველოს ყველა რეგიონშია. აჭარა წითელი ზონაა

14 სექტემბერს დილით საქართველოში დადასტურდა კორონავირუსის 165 ახალი შემთხვევა.

პანდემიის დაწყების შემდეგ ეს ყველაზე მაღალი მაჩვენებელია.

გაიზარდა გეოგრაფია – საქართველოში პრაქტიკულად არ დარჩა რეგიონი, სადაც ვირუსი არ გამოვლენილა.

ყველაზე მეტი – 109 შემთხვევა აჭარაში დაფიქსირდა.

გურია, ოზურგეთი – 4;

თბილისი – 17;

იმერეთი, ქუთაისი – 4;

კახეთი, გურჯაანი – 6;

მცხეთა-მთიანეთი, მცხეთა – 1;

სამეგრელო და ზემო სვანეთი, ზუგდიდი – 9;

ქვემო ქართლი, გარდაბანი – 9;

შიდა ქართლი, გორი – 6 შემთხვევა;

4 შემთხვევა – იმპორტირებულია.

“ყველაზე საყურადღებო არის აჭარა, სადაც ძალიან დიდი სამუშაოები მიმდინარეობს“, – განაცხადა ინფექციური საავადმყოფოს სამედიცინო დირექტორმა მარინა ეზუგბაიამ.

ეპიდაფეთქებაა ასევე გორსა და პანკისის ხეობაში – ახმეტის მუნიციპალიტეტის სოფელ მატანში, სადაც მოქალაქეთა დაინფიცირების მიზეზი, ეზუგბაიას თქმით, 5 სექტემბერს, გორში ჩატარებული 100-კაციანი ქორწილი გახდა.

„მოსახლეობას და მოქალაქეებს კვლავ მოვუწოდებთ, რომ თავი შეიკავონ ფართომასშტაბიანი ღონისძიებების ჩატარებისგან და არსებულ შეზღუდვებს და რეგულაციებს დაემორჩილონ, თორემ მრავალი ასეთი შედეგი დადგება, რომელიც კიდევ უფრო ცუდად წაადგება არსებულ სიტუაციას“, – განაცხადა ეზუგბაიამ.

____

ინფიცირებულთა საერთო რიცხვი 2392-მდე გაიზარდა. მათგან გამოჯანმრთელებულია 1369. ბოლო 24 საათში გამოჯანმრთელებულთა რიცხვი არ გაზრდილა.

ბოლო კვირის განმავლობაში კორონავირუსი დაუდასტურდა სამ პოლიტიკოსს – ლევან გოგიჩაიშვილს, თაკო ჩარკვიანს და გედი ფოფხაძეს.

ასევე, ვირუსი აღმოაჩნდა ორი ტელეკომპანიის – ტვ პირველის და რუსთავი 2-ის ჟურნალისტებს. ორივე ტელევიზიაში მასობრივი ტესტირება ჩატარდა, თუმცა სხვა ინფიცირებულები არ გამოვლენილა.