როგორ აღნიშნეს აგვისტოს ომის წლისთავი ცხინვალში
ფოტო ცხინვალის ცენტრშია გადაღებული
სამხრეთ ოსეთში მთელი დღის განმავლობაში სამგლოვიარო ღონისძიებები მიმდინარეობდა, სადაც პატივს მიაგებდნენ ომში დაღუპულ ჯარისკაცებს.
ხელისუფლებისა და საზოგადოების წარმომადგენლებმა ცხინვალში რუსი სამშვიდობოების ძელგთან ყვავილები და გვირგვინები მიიტანეს. შემდეგ აქციის მონაწილეები “დამწვარი სულების მუზეუმში” მივიდნენ. ეს მუზეუმი ზარის შემოვლით გზაზეა და იგი იმ ცხინვალელების ხსოვნას ეძღვნება, რომლებიც 2008 წლის აგვისტოში, საომარი მოქმედებების დროს ქალაქის დატოვებას ცდილობდნენ, თუმცა სროლების ქარ-ცეცხლში აღმოჩდნენ.
სწორედ აქ გადაუხადეს პარაკლისი სამხრეთ ოსეთის მშვიდობიან მცხოვრებლებს, რომლებიც ომის დროს დაიღუპნენ. დაღუპულ სამხედრო მოსამსახურეთა და სამოქალაქო პირთა სულებისთვის პანაშვიდი ცხინვალის ტაძარშიც გადაიხადეს. პირველად, ომის დასრულებიდან 9 წლის შემდეგ, სამგლოვიარო ღონისძიებები ლენინგორშიც ჩატარდა.
ოსი პოლიტოლოგი დინა ალბოროვა თავის ფეისბუკ-გვერდზე ასე ეხმაურება ამ დღეს:
“ომისკენ გზა ძალიან მოკლეა, მშვიდობისკენ კი, ხანგრძლივი და მტკივნეული პროცესი. ნათელი ხსოვნა მათი, ვინც თავი გაწირა სამხრეთ ოსეთისთვის, მისი თავისუფლებისთვის; იმისთვის, რომ სამხრეთ ოსეთში ოსური საუბარი ისმოდეს; იმისთვის, რომ ამ ქვეყნის მოქალაქეები სიამაყით ამბობდნენ – მე სამხრეთ ოსეთიდან ვარ. ჩვენ, ცოცხლებს კი, იმას ვუსურვებ, რომ ვიფიქროთ დღევანდელ დღეზე და ჩვენი შვილებისთვის უკეთეს მომავალზე და ნუ დავრჩებით წარსულში!”
პარტია “ფიდიბასტა”-ს ლიდერმა ვიაჩესლავ გობოზოვმა უთხრა “ეხო კავკაზას”: “აი, მაგალითად, ჩვენ, ბავშვობაში დიდი სიამოვნებით ვთამაშობდით ომობანას, ფაშისტებს და ა.შ. მე არ მახსენდება, რომ დღევანდელი ბავშვები ომს თამაშობდნენ. ან როგორ უნდა ითამაშო ის, რაც შენი თვალით გინახავს? არც ამ ბავშვებისთვის, არც ჩვენთვის ომი არ დასრულებულა და არ დასრულდება არასოდეს. ეს ჩვენი ცხოვრების მოცემულობაა”.
დღეს 9 წელი გავიდა აგვისტოს ომიდან. JAMnews-ის კორესპონდენტები თბილისიდან და ცხონვალიდან დილიდან აკვირდებიან, თუ როგორ ჩაიარა ამ თარიღმა კონფლიქტის ორივე მხარეს. თბილისიდან ფოტორეპორტაჟი ნახეთ აქ.
