ხანძარი საქართველოში - ფოტოები სტიქიის ზონიდან

ფოტოების ავტორი: დავით თაბაგარი

ბორჯომის ხეობაში უკვე მესამე დღეა ხანძრის ჩაქრობის სამუშაოები მიმდინარეობს. საქართველოს ამ პროცესში აზერბაიჯანი, სომხეთი, ბელარუსი და თურქეთიც ეხმარებიან, თუმცა ცეცხლის ლიკვიდირება ჯერ ვერ მოხერხდა. ამ დროისთვის, დაახლოებით, 12 ჰექტარი ტყის საფარია დამწვარი.

ცეცხლის ქრობის პროცესი ვერტმფრენებით დილამდე შეწყდა. თუმცა ადგილზე მუშაობს ცოცხალი ძალა, რომელიც ხანძრის გავრცელების პრევენციას ცდილობს.

სიტუაციას კვლავ ართულებს უამინდობა, კერძოდ ძლიერი ქარი, რაც ხანძრის ჩაქრობას ართულებს.

ბორჯომის ხეობის გარდა ხანძრის კერა საქართველოს მასშტაბით კიდევ 4 ადგილზე გაჩნდა. ტერიტორიები, სადაც მეხანძრეები მუშაობენ შემდეგია:

გორი, ატენის ხეობა – დაიწვა წიწვოვანი ტყე ზემო ბოშურში, ფართობი დაახლოებით ერთი ჰექტარია. საგანგებო სიტუაციების სამსახურის ცნობით, ხანძარი ლოკალიზებულია, თუმცა მიმდინარეობს ლიკვიდაციის სამუშაოები.

ლაგოდეხი – აქ ნახევარი ჰექტარი ბალახი იწვის. საგანგებო სიტუაციების სამსახურის ცნობით, ხანძარი ლოკალიზებულია და 2 ჯგუფი განაგრძობს მუშაობას.

შატილის გზა – აქ დაახლოებით 2 ჰექტარი მიწის ფართობი დაიწვა. თუმცა ცეცხლი ლოკალიზებულია და მიმდინარეობს სალიკვიდაციო სამუშაოები.

თბილისი –  გლდანში ხანძარი შემოვლით გზაზე ხევში გაჩნდა. ადგილზე ორი სახანძრო-სამაშველო ბრიგადა მუშაობს. უცნობია ზარალის ოდენობა.