ჩეჩნეთის პარლამენტმა გეების დევნის შესახებ მოხსენების განხილვაზე უარი განაცხადა

ჩეჩნეთის პარლამენტის სამდივნოს წარმომადგენელმა ზელიმჰან ჯამალდინოვმა განაცხადა, რომ ჩეჩნეთში ადამიანების მასობრივი წამების შესახებ Human Rights Watch-ის მოხსენება  სერიოზულ საკითხს არ წარმოადგენს და პარლამენტში განხილვას არ იმსახურებს.

მასობრივი საინფორმაციო საშუალებები, რაც უნდათ, იმას წერენ, და ყველაფერზე რეაგირებას ხომ არ მოვახდენთ – მიგვიფურთხებია, თუ რას დაწერენ ვიღაც ევროპელი, გაყიდული, კმაყოფაზე მყოფი ჟურნალისტები“, – განცხადა ზელიმჰან ჯამალდინოვმა 26 მაისს, – იუწყება  „კავკაზსკი უზელი“. 

ასეთი რეაქცია ჰქონდა ჩინოსანს ავტორიტეტული საერთაშორისო უფლებადამცველი ორგანიზაციის შეტყობინებაზე, რომლის თანახმადაც, ჩეჩნეთის პარლამენტის მეთაური მაგომედ დაუდოვი პირადად ესწრებოდა იმ ადამიანების დამცირებას, რომლებიც რესპუბლიკაში ჰომოსექსუალიზმში ეჭვმიტანილობის გამო დააკავეს. პარლამენტის ხელმძღვანელს ამ ინფორმაციაზე თავად არავითარი კომენტარი არ გაუკეთებია. მაგრამ, ჩეჩნეთში დაკავებულმა სამმა ჰომოსექსუალმა პირადად ნახა პარლამენტის სპიკერი მაგომედ დაუდოვი, როდესაც არღუნსა და გროზნოში პატიმრობაში იმყოფებოდნენ, – ნათქვამია   HRW-ის მოხსენებაში.

შეგახსენებთ, რომ 1 აპრილს „ნოვაია გაზეტამ“ ჩეჩნეთში ლგბტ პირების  მასობრივი დაკავებებისა და მკვლელობების შესახებ  მასალა გამოაქვეყნა, მოგვიანებით კი არღუნში გეებისთვის განკუთვნილი „საიდუმლო ციხის“ შესახებ იუწყებოდა. 24 აპრილს გაზეთი იტყობინებოდა, რომ რეპრესიების ქვეშ მოყოლილი ჩეჩნეთის 26 მცხოვრებლის სია, მათ შორის ჰომოსექსუალურ ორიენტაციაში ეჭვმიტანილობის გამო, სამძებრო კომისიას გადაეცა.