ჩერკესკში სასამართლომ იეჰოვას მოწმეების ორგანიზაცია დახურა

ქალაქ ჩერკესკის იეჰოვას მოწმეების ორგანიზაცია ექსტრემისტულად არის მიჩნეული და უნდა გაუქმდეს, მისი ქონება კი სახელმწიფოს გადაეცეს.  ასეთი დადგენილება 10 თებერვალს ყარაჩაი-ჩერქეზეთის უზენაესმა სასამართლომ გამოიტანა.

მანამდე რესპუბლიკის პროკურატურამ რელიგიური ორგანიზაციის წინააღმდეგ საქმე აღძრა ექსტრემისტული მასალების წარმოებისა და გავრცელების მუხლით. მაშინ იეჰოვას მოწმეები მხოლოდ ჯარიმისა და ლიტერატურის კონფისკაციით დასაჯეს. თუმცა, იმის გამო, რომ ორგანიზაციას „ექსტრემისტური საქმიანობა“ არ შეწყვიტა, საქმე სასამართლომდე მივიდა.

რუსეთის ფედერაციის გენერალურმა პროკურატურამ გასული წლის აპრილში იეჰოვას მოწმეების წინააღმდეგ აქტიური საქმიანობა დაიწყო, როდესაც ოფიციალურად გააფრთხილა იეჰოვას მოწმეების ადმინისტრაციული ცენტრი „ექსტრემისტული ქმედებების დაუშვებლობის“ შესახებ. ორგანიზაციის წარმომადგენლებმა მაშინ განაცხადეს, რომ იეჰოვას მოწმეების ორგანიზაციების გაუქმებას, მათი თემის წევრების დევნასა და ტექსტების აკრძალვას რელიგიურ დისკრიმინაციად მიიჩნევენ.

პროკურატურის გაფრთხილება სასამართლოში გასაჩივრდა, თუმცა 16 იანვარს მოსკოვის საქალაქო სასამართლომ პროკურატურის დოლუმენტი ძალაში დატოვა. ეს კი იმას ნიშნავს, რომ ორგანიზაცია ვალდებულია „დარღვევები გამოასწოროს“, სხვა შემთხვევაში, მთელი ქვეყნის მასშტაბით აიკრძალება.

• 2014 წლიდან დღემდე, რუსეთის ფედერაციაში სასამართლო გადაწყვეტილებებით უკვე გაუქმებულია იეჰოვას მოწმეების შვიდი ორგანიაზცია. ტაგანროგში, აკრძალვის მიუხედავად თემის საქმიანობის გაგრძელებისთვის 16 ადამიანი გასამართლდა. ახლა იეჰოვას მოწმეების მიმართ აღძრულია სისხლის სამართლის ოთხი საქმე „სიძულვილისა და მტრობის გაღვივებისა“და „ადამიანების უფლებების შემლახავი არაკომერციული ორგანიზაციის შექმნის“ მუხლებით.

• მანამდე, 2005 წელს მოსკოვის გოლოვინის რაიონის სასამართლომ იეჰოვას მოწმეების მოსკოვის ორგანიზაციის საქმიანობა აიკრძალა. ორგანიზაციის წარმომადგენლებმა სარჩელით ევროპის ადამიანის უფლებათა სასამართლოს მიმართეს, რომელმაც 2010 წელს რუსეთის სასამართლოს გადაწყვეტილებებში ევროპული კონვენციის რიგი მუხლების დარღვევის ფაქტი გამოავლინა. ორგანზიაციის  რეგისტრაცია მხოლოდ 2015 წელს განახლდა.

• რუსეთის ფედრაციაში ამჟამად 100-დან 150 ათასამდე იეჰოვას მოწმეა – ქრისტიანული მიმართულების მიმდევრები, რომელიც სათავეს იღებს ბიბლიის მკვლევართა მოძრაობიდან (ინგლ. Bible Students). ეს მოძრაობა 1872 წელს აშშ-ში ჩარლზ რასელმა დააარსა. თავად ორგანიზაციის მონაცემების მიხედვით, ამ სწავლებას მსოფლიოში სულ 8 მილიონი მიმდევარი ჰყავს.