ყოფილი რუსი პარლამენტარი კიევში იარაღის გასროლით მოკლეს

23 მარტს კიევის ცენტრში  რუსეთის ფედერაციის  სახელმწიფო სათათბიროს ყოფილი დეპუტატი დენის ვორონენკოვი მოკლეს. დაჭრილია მისი მცველი. მსროლელი საპასუხო სროლით დაიჭრა, მოგვიანებით კი საავადმყოფოში გარდაიცვალა.

შემთხვევა კევის ცენტრში, „პრემიერ-პალასის“ სიახლოვეს დაახლოებით შუადღეს მოხდა. ვორონენკოვს ТТ-ს მარკის პისტოლტიდან ესროლეს.

დენის ვორონენკოვი რუსეთის  წინა მოწვევის სახელმწიფო სათათბიროს დეპუტატი იყო, ახალში ვერ მოხვდა, 2016 წლის ბოლოს კიევში გადავიდა და უკრაინის მოქალაქეობა მიიღო. იქ ის რუსეთის პოლიტიკური სიტუაციის კრიტიკით გამოვიდა და გენერალურ პროკურატურას უკრაინის ყოფილი პრეზიდენტის ვიქტორ იანუკოვიჩის მიერ სახელმწიფოს ღალატის შესახებ მისცა ჩვენება.

ვორონენკოვთან ერთად უკრაინაში საცხოვრებლად გადავიდა  მისი ცოლი მარია მაქსაკოვა – ასევე, რუსეთის პარლამენტის ყოფილი დეპუტატი, ოპერის მომღერალი, მარინის თეატრის სოლისტი და კრიმინალური ავტორიტეტის ვლადიმირ ტურინის ყოფილი ცოლი.

რუსეთში დენის ვორონენკოვის წინააღმდეგ ნახევარი მილიონი დოლარის ღირებულების უძრავი ქონების თაღლითობის გზით მიტაცებისთვის სისხლის სამართლის საქმეა აღძრული. მას პოლკოვნიკის წოდება და დოქტორის სამეცნიერო ხარისხი ჰქონდა. რუსული მასობრივი საინფორმაციო საშუალებების თანახმად, ვორონენკოვი იყო ეგრეთ წოდებული „მომგვარებელი“ – ადამიანი, რომელსაც  კრიმინალურ გარიგებებში მხარეთა შორის კონფლიქტების მოგვარება შეუძლია.

უკრაინის პრეზიდენტმა პიოტრ პოროშენკომ ვორონენკოვის მკვლელობას „რუსეთის მხრიდან პოლიტიკური ტერორიზმის აქტი“ უწოდა. პრეზიდენტ პუტინის პრეს-მდივანმა მომხდარის შესახებ კომენტარის გაკეთებაზე უარი განაცხადა.

შეგახსენებთ, რომ 20 თებერვალს მოულოდნელად და გაურკვეველ ვითარებაში გარდაიცვალა გაეროში რუსეთის წარმომადგენელი ვიტალი ჩურკინი. თავის დროზე მან გაეროს უშიშროების საბჭოს წარუდგინა ვიქტორ იანუკოვიჩის წერილი ვლადიმირ პუტინისადმი, რომელშიც ის უკრაინის ტერიტორიაზე რუსული ჯარის შეყვანას მოითხოვს. ჩურკინის სიკვდილის შემდეგ რუსული მხარე ამგვარი მიმართვის არსებობას უარყოფს.