ყველაზე მეტი ფულადი გზავნილი საქართველოში რუსეთიდან შემოდის

საქართველოში ყველაზე მეტი ფულადი გზავნილი რუსეთიდან შემოდის. მეორე ადგილზე იტალიაა, მესამეზე – საბერძნეთი.

გასული წლის დეკემბერში რუსეთიდან 45 მლნ დოლარი შემოვიდა და ფულადი გზავნილების საერთო რაოდენობის 32,5 პროცენტი შეადგინა. იტალიიდან – 15,4 მლნ დოლარი, საბერძნეთიდან – 15,1 მლნ.

შემდეგი სამი ქვეყანაა აშშ (13.1), ისრაელი (12.4) და თურქეთი (10.0).

საქართველოს ეროვნული ბანკის მონაცემებით, 2017 წლის დეკემბერში საქართველოში ფულადი გზავნილების სახით სულ 138.4 მლნ აშშ დოლარი შემოვიდა, რაც წინა წლის დეკემბერთან შედარებით 16.3 პროცენტით (19.4 მლნ აშშ დოლარით) მეტია.

რაც შეეხება საქართველოდან საზღვარგარეთ გაგზავნილ ფულს – 2017 წლის დეკემბერში საქართველოდან საზღვარგარეთ 19.8 მლნ აშშ დოლარი (51.8 მლნ ლარი) გადაიგზავნა. გასული წლის დეკემბერთან შედარებით ეს ციფრი 1.6 მლნ დოლარით გაზრდილია.

რუსეთში, იტალიასა და საბერძნეთში ყველაზე მეტი ქართველი ემიგრანტი ცხოვრობს და მუშაობს. ისინი ყოველთვიურად გამოგზავნილი ფულით საქართველოში დარჩენილ ოჯახებს არჩენენ.