ქართველ აბიტურიენტებს წელს მხოლოდ ერთ, "საპილოტე" კონდიციონერს ჩაურთავენ
ქართველ აბიტურიენტებს ერთიანი ეროვნული გამოცდების ჩაბარება წელსაც უკონდიციონერო საგამოცდო ცენტრებში მოუწევთ.
“კონდიციონერების სისტემა დიდ ხარჯებთან არის დაკავშირებული”, – ასე ხსნის განათლების მინისტრის ამ გადაწვეტილებას შეფასებისა და გამოცდების ეროვნული ცენტრის დირექტორი მაია მიმინოშვილი სააგენტო “ინტერპრესნიუსთან” საუბარში.
მიმინოშვილის თქმით, ერთადერთი საგამოცდო ცენტრი, სადაც წელს კონდიციონერი იმუშავებს, რუსთავში იქნება.
რუსთავში კონდიციონერის ჩართვას მიმინოშვილი “საპილოტე პროექტს” უწოდებს.
„ძალიან რთული ვითარება იყო რუსთავის საგამოცდო ცენტრში, რადგან მთელი დღის განმავლობაში მზე ადგას შენობას, ამიტომ, როგორც საპილოტე პროექტი, მხოლოდ ამ საგამოცდო ცენტრში იქნება წელს კონდენციონერი”, – ამბობს ის.
კონდიციონერზე საუბრისას, მიმინოშვილი აღნიშნავს, რომ უსამართლოდ მიაჩნია გამოცდების სიცხეში ჩატარება, თუმცა ამასთან საუბრობს იმ პრობლემებზე, რაც კონდიცირებას შეიძლება მოჰყვეს:
“ბევრი ადამიანი ვერ ეგუება კონდინციონერს, თან ეს ხმაურის პრობლემასაც შექმნის სექტორში. რთულია, ყველას სურვილს მოერგო. თუმცა, ამ ეტაპზე რუსთავის საგამოცდო ცენტრში კონდინცირება იქნება“, – აცხადებს მიმინოშვილი.
კონდიცირების პრობლემა საქართველოში ყოველი ეროვნული გამოცდების წინ დგება. გასული წლების განმავლობაში საგამოცდო ცენტრებში უჰაერობისა და მაღალი ტემპერატურის გამო, აბიტურიენტები და მათი მშობლები გაუსაძლის პირობებსა და კონდენცირების აუცილებლობაზე საუბრობდნენ. რამდენიმე აბიტურიენტი სიცხის გამო ცუდადაც კი გახდა.
ერთიანი ეროვნული გამოცდები საქართველოში 2 ივლისს დაიწყება და 26 ივლისამდე გასტანს. ივლისი ყველაზე ცხელი თვეა საქართველოში. წელს კი, სინოპტიკოსები საქართველოში განსაკუთრებით ცხელ ზაფხულს პროგნოზირებენ. ამჟამად, ივნისის ბოლოს საქართველოში 40-41 გრადუსი სიცხეა.
მაია მიმინოშვილის ამ ინტერვიუს დიდი გამოხმაურება ჰქონდა სოციალურ ქსელებში და ბევრი ხუმრობის ხასიათზეც დააყენა:
