ფორმულა1-ის აზერბაიჯანის გრან-პრის ფინალის შედეგები მოულოდნელი აღმოჩნდა

25 ივნისს ბაქოში ავტორბოლაში მსოფლიო ჩემპიონატის “ფორმულა-1”-ის მერვე ეტაპის აზერბაიჯანის გრან-პრის ფინალური რბოლა გაიმართა. ფინიშის ხაზთან პირველი მივიდა Red Bull-ის წარმომადგენელი, ავსტრალიელი დანიელ რიკარდო, რომელმაც სტარტი მხოლოდ მეათემ აიღო. ვერცხლის პრიზი ერგო Mercedes-ის გუნდის წევრს ვალტერ ბოტტასს. ის პირველ წრეზე ავარიაში მოჰყვა, თუმცა საბოლოოდ მე-20 პოზიციიდან მე-2 ადგილამდე შეძლო მიღწევა. მესამე ადგილი დაიკავა ჩემპიონატის ახალბედა მონაწილემ, “უილიამსის” კანადელმა წევრმა, 18 წლის ლენს სტროლმა, რომელიც ისტორიაში პოდიუმზე ასული ყველაზე ახალგაზრდა დებიუტანტი გახდა.

ეტაპის გამარჯვებულმა რიკარდომ საშუალო სისწრაფე – 208 კმ/სთ უჩვენა.

ჩემპიონატის ლიდერები – ლუის ჰემილტონი და სებასტიან ფეტელი – სამეულის მიღმა დარჩნენ. მსოფლიოს ექს-ჩემპიონმა, ბრიტანელმა ჰემილტონმა პირველმა აიღო სტარტი, თუმცა ბოლიდის კორპუსში ტექნიკური პრობლემის გამო, ლიდერობა ხელიდან გაუშვა. მეორე ექს-ჩემპიონმა, ფეტელმა, ჰემილტონთან შეჯახებისთვის 10-წამიანი ჯარიმა stop & go მიიღო.

რბოლა ბაქოს ცენტრალურ ქუჩებში მიმდინარეობდა, ქალაქის ძველი ნაწილის გავლით. წრის სიგრძე ექვს კილომეტრზე ოდნავ მეტი იყო, მანქანები საათის ისრის საწინააღმდეგო მიმართულებით მოძრაობდნენ. სწორედ ძველი ქალაქისკენ მიმავალი მოსახვევი დაასახელა ბევრმა პილოტმა ტრასის ყველაზე რთულ მონაკვეთად. “აქ ძალიან რთული გზის მონაკვეთია, და პილოტს არავითარი შეცდომის დაშვების უფლება არ აქვს, აქ ისეთი სიზუსტეა საჭირო, როგორც არსად”, – განუცხადა მომავალმა პრიზიორმა ბოტტასმა აზერბაიჯანული ტელევიზიის სპორტულ არხს.

ამ საინტერესო ბრძოლით მაყურებელი კმაყოფილი დარჩა. აი, რამდენიმე ციტატა სოციალური ქსელებიდან:

• “ვფიქრობ, აზერბაიჯანის გრან-პრის დღევანდელი რბოლა “ფორმულა-1″-ის ისტორიაში შევიდა როგორც ყველაზე მოულოდნელი, გიჟური, დრამატული და სუპერ საინტერესო”.
• “ეს არათუ არამოსაწყენი რბოლაა, არამედ რაღაც “საგიჟეთია”. ტრასაზე მანქანების ნამსხვრევების აღებას ვერ ასწრებენ, უსაფრთხოების მანქანები 4-ჯერ გადიან. ავარიების გამო, 5 შეჯიბრს გამოეთიშა. ასეთი რამ არასდროს მინახავს: პილოტები ერთმანეთს მუშტებს უქნევენ… ყველა მანქანა პიტ-ლეინზეა შესაკეთებლად გაყვანილი, სულ 10 წუთი აქვთ. აი, მესმის შოუ! პილოტებს დიდხანს ემახსოვრებათ ბაქოში გატარებული ეს დღე!”
• “ბუკმეკერები მეცოდება. მათი არც ერთი პროგნოზი არ გამართლდა, ასეთი სენსაციური შედეგების გამო, ალბათ ბევრმა იზარალა”.

“ფორმულა-1-ის” ეტაპების ბაქოში ჩატარების ხელშეკრულება 2021 წლის ჩათვლით არის დადებული და შეიძლება შემდეგაც გაგრძელდეს.

გთვაზობთ მოვლენის ადგილიდან JAMnews-ის კორესპონდენტის ფოტორეპორტაჟს: