უზენაეს სასამართლოსთან "რუსთავი 2"-ის მხარდამჭერი აქცია გაიამართა
სიტყვის თავისუფლების დაცვის მოთხოვნით რვა პოლიტიკური გაერთიანებისგან შემდგარმა საკოორდინაციო საბჭომ, სტუდენტებმა და საზოგადოების წარმომადგენლებმა უზენაეს სასამართლოსთან აქცია გამართეს.
„ნაციონალური მოძრაობის“ წევრის ნიკა მელიას განცხადებით, ხელისუფლების ზეწოლით უზენაესი სასამართლო აპირებს ტელეკომპანია „რუსთავი 2“-ის საწინააღმდეგო გადაწყვეტილება გამოიტანოს.
აქციის ორგანიზატორების თქმით, “რუსთავი 2”-ის საქმის არაობიექტური გადაწყვეტის შემთხვევაში, პერმანენტული აქციები გაიმართება. მათი შეფასებით, საქართველოში სიტყვის თავისუფლება საფრთხეშია.
„არა მედიაზე შტურმს“ – ბანერი ამ წარწერტით პარლამენტის სხდომათა დარბაზში „ევროპული საქართველოს“ წარმომადგენლებმა გააკრეს, რასაც უმრავლესობის წევრთა და ოპოზიციის დეპუტატებს შორის სიტყვიერი დაპირისპირება მოჰყვა.
დეპუტატ ელენე ხოშტარიას თქმით, ეს არის პროტესტის ერთგვარი ფორმა და ის სოლიდარობას უცხადებს ყველა იმ ადამიანს, ვინც მედიაში მიმდინარე პროცესებთან დაკავშირებით წინააღმდეგობას გამოხატავს.
ტელეკომპანია “რუსთავი 2”- თან დაკავშირებული დავა, უკვე მეორე წელია, გრძელდება. ტელეკომპანიის ყოფილი მეპატრონე ქიბარ ხალვაში “რუსთავი 2”-ის მის მფლობელობაში დაბრუნებას ითხოვს და აცხადებს, რომ ტელეკომპანია მას წინა ხელისუფლებამ იძულებით ჩამოართვა.
ივნისში გამართულ სასამართლო პროცესზე სააპელაციო სასამართლომ “რუსთავი-2” ქიბარ ხალვაშის საკუთრებად გამოაცხადა, თუმცა ტელეკომპანიის ადვოკატებმა გადაწყვეტილება უზენაეს სასამართლოში გაასაჩივრეს.
ტელეკომპანია “რუსთავი 2”-ის საქმეზე უზენაესი სასამართლო გადაწყვეტილებას, სავარაუდოდ, 15 თებერვალს გამოაცხადებს.
