სურკოვი "პროდასავლელი უწმინდურია", რომელიც სამხრეთ ოსეთში კორუფციას ახალისებს

ედუარდ კოკოითი

რუსეთში პოპულარული ონლაინ გადაცემა „სივკოვის საათი“ სამხრეთი ოსეთის საკითხს დაეთმო.

გადაცემის სახელწოდება ხმაურიანია – „სამხრეთი ოსეთის უცნობი საიდუმლოებები“. დასახელებული თემები – კიდევ უფრო ხმაურიანი, კერძოდ:

რატომ დგას ასე მწვავედ რეპუბლიკაში კორუფციის საკითხი,

და რაში გამოიხატება ადგილობრივ პოლიტიკაზე რუსეთის პრეზიდენტის მრჩევლის ვლადისლავ სურკოვის (რომელსაც გადაცემაში „სამხრეთი ოსეთისა და აფხაზეთის კურატორად“ მოიხსენიებენ) მავნე გავლენა?

ამ და სხვა მწვავე შეკითხვებს სამხრეთი ოსეთის მეორე (უკვე ექს) პრეზიდენტმა, დღესდღეობით წამყვანმა ოპოზიციონერმა პოლიტიკოსმა, ედუარდ კოკოითიმ უპასუხა.

გადაცემის წამყვანია – კონსტანტინ სივკოვი, რომელიც თავს სამხედრო მეცნიერებათა დოქტორად წარადგენს.

JAMnews შეჯამებულად გთავაზობთ საუბრისას განხილულ ძირითად საკითხებს.

პროდასავლური ძალები სამხრეთ ოსეთში

კონსტანტინ სივკოვი:

“მე წავიკითხე რუსეთის ფედერაციის პრეზიდენტის მისამართით სამხრეთი ოსეთის ყველაზე ავტორიტეტული პარტიებისა და მოძრაობების (14 ხელმომწერი- JAMnews) მიერ დაწერილი მიმართვა. წერილში ნათქვამია, რომ ბატონი სურკოვი, რომელიც რუსეთის ფედერაციის მხრიდან   სამხრეთი ოსეთისა და აფხაზეთის რეგიონებზე აგებს პასუხს, თავისი ქმედებებით ქვეყანაში სიტუაციის დესტაბილიზაციას იწვევს. მინდა ყურადღება გავამახვილო იმაზეც, რომ რუსეთის პატრიოტულ ძალებს ბატონ სურკოვთან თავიანთი ანგარიშები გააჩნიათ – 1990-იან და 2000-იან წლებში მისი საქმიანობის გამო”.

ედუარდ კოკოითი:

ედუარდ კოკოითიმ კითხვაზე პასუხის გაცემისას ვლადისლავ სურკოვი და მისი გუნდი „პროდასავლურ ძალებად“ მოიხსენია და თქვა, რომ საჭიროა ამ საკითხში „მკაფიოდ გარკვევა“.

“ჩვენ, მთელ პატრიოტულ ძალებს, სიფრთხილე გვმართებს… რუსეთს იმ დახმარებისა და თანადგომისთვის, რაც მან გაგვიწია, ყველა ვემადლიერებით… თითოეული ოსი მადლიერია.

მაგრამ ისიც კარგად ვიცით, თუ ასე ძლიერ რატომ არიან დაინტერესებულები ეგრეთ წოდებული კურატორები… მათ მიერ სამხრეთ ოსეთში შემოყვანილი კონტრაქტორი ორგანიზაციების მუშაობაში უამრავი ხარვეზი არსებობს. ეს მრავალბინიანი კომპლექსის, თეატრისა და სხვა ობიექტების მშენებლობასაც ეხება. ფული გამოყოფილია – მაგრამ ან ბოლომდე არ არის აშენებული, ანდა აშენებულია – დიდი ტექნოლოგიური დარღვევებით. ზოგიერთი შენობა პრაქტიკულად ჯერ კიდევ დაუსრულებელია, თუმცა უკვე ავარიულია, მათ შორის – გმირების ქუჩაზე მდებარე კომპლექსიც.

კურატორების მიერ შემოყვანილმა კონტრაქტორმა ორგანიზაციებმა „ზედაპირიდან მოხდილი ნაღები“ მიითვისეს, და გაემგზავრნენ. 2011 წელსაც იგივე იყო. ეს ასე ხდება:

• კონტრაქტორი ორგანიზაცია საქმეს ვერ ასრულებს და ობიექტს სასწრაფოდ აბარებს ოსურ მხარეს;
• ოსური მხარე ობიექტს იმ გარანტიით იბარებს, რომ ყველაფერი დაფინანსდება;
• სამუშაოს ასრულებენ – და ხახამშრალები რჩებიან.

ბევრი ოპონენტი მსაყვედურობს, თითქოს ჩემი გამოსვლები რუსეთის საწინააღმდეგოა. მე მათ ვპასუხობ – ალბათ ეს თქვენმა კურატორებმა შთაგაგონეს? მე თქვენს კურატორებს იმიტომ ვლანძღავ, რომ სწორედ მათ მიიყვანეს საქმე კრიტიკულ სიტუაციამდე. თუ ეს რუსეთის ფედერაციის სამძებრო კომიტეტსა და პროკურატურას აინტერესებს.

ამ რთულ დროში ჩვენ რუსეთის ფედერაციის ავტორიტეტი გვაღელვებს, როდესაც მის წინააღმდეგ სანქციებს აწესებენ, და (ქვეყანას)მთელი დანარჩენი მსოფლიო აუტანელ პირობებს უქმნის. დღეს რუსეთისა და პუტინის დამსახურებით – ერთპოლუსიანი სამყარო ინგრევა. ეს ბევრს უკარგავს მოსვენებას, და ბუნებრივია, პროდასავლური ძალები ყველანაირად ცდილობენ, რომ შებოჭონ … პუტინი.

მოდით, სამხრეთი ოსეთის მოსახლეობას ვკითხოთ – პროდასავლური და პროქართული ძალები რამდენად თავისუფლად გრძნობენ ახლა აქ თავს? და ესეც იმ კურატორების გამო ხდება, რომლებიც სამხრეთ ოსეთს ხელმძღვანელობენ“.

კოკოითიმ ასევე თქვა, რომ „ახალი საინფორმაციო ტექნოლოგიების საუკუნეში ახალგაზრდობას გონება ეწამლება, ამიტომ ძალიან დიდი სიფრთხილეა საჭირო, და გულხელდაკრეფილი ჯდომა და ამ ყველაფრის გვერდიდან ყურება დაუშვებელია“.

სიტუაციის დღევანდელი განვითარება სამხრეთ ოსეთში

ედუარდ კოკოითი:

“ჩვენთან, სამხრეთ ოსეთში ახალი პრეზიდენტი აირჩიეს – ბიბილოვი, ადამიანი, რომელიც სამხრეთი ოსეთისთვის იბრძოდა, ადამიანი, რომელიც არავის ზურგს არ ამოფარებია. მას შემდეგ, რაც ჩვენ (კოკოითის მომხრეებმა – JAMnews) მას ოფიციალურად დავუჭირეთ მხარი – ძალიან ბევრი ისეთი ადამიანი გაჩნდა, ვინც ჩვენთვის ძირის გამოთხრას ცდილობს; მათ შორის ის პროდასავლური ძალებიც, ის კურატორები, რომლებიც (პრეზიდენტზე) გავლენის მოხდენას ცდილობენ, და მას სამხრეთი ოსეთის პატრიოტულ ძალებთან ნაყოფიერად ურთიერთობის საშუალებას არ აძლევენ.

ჩვენ განზე მდგომის პოზიციის დაკავებას და იმის ლოდინს არ ვაპირებთ, თუ როდის წაბორძიკდება ადამიანი, პირიქით მზად ვართ, დავეხმაროთ მას, რადგან ვხედავთ, თუ რამდენად რთულ მდგომარეობაში იმყოფება ის. ისიც ვიცით, რომ მასზე ძალიან სერიოზული ზეწოლა იქნება, მათ შორის დაფინანსების შეწყვეტის მუქარაც. ეს აზრი უკვე გამოითქვა ზოგიერთი პოლიტოლოგის მხრიდან.

უნდა ვთქვა, რომ იმ პოლიტოლოგების საყვარელი ტრიბუნა, რომლებიც წინასაარჩევნო კამპანიის დროს სხვადასხვა შეფასებას აკეთებდნენ და მე მაკრიტიკებდნენ, თბილისი იყო. ეს პოლიტოლოგები წამყვან როლს ასრულებდნენ სამხრეთი ოსეთის წინასაარჩევნო კამპანიაში, და ისინი წყვეტდნენ – თუ ვინ იქნებოდა არჩევნებზე დაშვებული, და ვინ – არა. ჩვენი სასამართლო ორგანოებისგან ჩემი არდაშვების გადაწყვეტილებას ნამდვილად არ მოველოდი. ჩვენ ბევრი საშუალებით შეგვეძლო ამას წინ აღვდგომოდით, მაგრამ სტაბილურობის შენარჩუნება ვარჩიეთ, რადგან სამხრეთი ოსეთის ავტორიტეტს ვუფრთხილდებით“.

დასავლეთი, საქართველო და სამხრეთი ოსეთი

კონსტანტინ სივკოვი:

“არსებობს თუ არა იმის საშუალება, რომ დასავლეთსა და თბილისზე ორიენტირებული ძალების ნეგატიური გავლენა შესუსტდეს?“

ედუარდ კოკოითი:

„მე ის მაფიქრებს, რომ 2011 წლამდე სამხრეთ ოსეთში პროქართული ძალები პრაქტიკულად არ არსებობდა. ამჟამად ასეთი ძალები არსებობს, და მხოლოდ ის შევძელით, რომ ეს ადამიანები ხელისუფლებაში არ დარჩნენ. ახალ გუნდში ისინი თითქმის არ არიან.

მაფიქრებს ისიც, რომ (ზოგიერთი) რუსეთიდან მოვლენილ ადამიანებს შორის, რომლებიც ძალოვან სტრუქტურებს წარმოადგენენ, ყველა როდია განმსჭვალული რუსეთისადმი პატრიოტული ვალდებულების შეგრძნებით. მათ… ისეთი ადამიანების პირობები მიიღეს, ვინც დღეს მშენებლობის სხვადასხვა საკითხით და სახსრების „დანაწევრებით“ არის დაკავებული“.  

მიმართვა რუსეთის ფედერაციის გენერალური პროკურატურისადმი სამხრეთ ოსეთში სახსრების გაფლანგვის საკითხზე გამოძიების ჩატარების წინადადებით

პროგრამის წამყვანმა კონსტანტინ სივკოვმა რუსეთის ფედერაციის გენერალურ პროკურატურას წინადადებით მიმართა, რომ სამხრეთ ოსეთში თანხების არამიზნობრივი ხარჯვისა და პირდაპირი კორუფციის დამადასტურებელი დოკუმენტები წარმოედგინა.

ამავდროულად მან ისიც განაცხადა, რომ კანონიერი ზომები გატარდება „დასავლური უღირსობის წინააღმდეგ, რომელიც ახრჩობს (რუსეთს) და სამხრეთ ოსეთსაც“.

ედუარდ კოკოითიმ უპასუხა, რომ ზოგიერთმა რუსმა კონტრაქტორმა უკვე მიმართა რუსეთის პრეზიდენტს საჩივრებით, რომ მათ ის შემოსავალი ვერ მიიღეს, რაც უნდა მიეღოთ.

“მოდით, მათ წერილებსა და მიმართვებზე რეაქციას დაველოდოთ, მე კი დიდი სიამოვნებით მზად ვარ, დაგეხმაროთ“, – განაცხადა ედუარდ კოკოითიმ.

სტატიაში გამოთქმული მოსაზრებები და ავტორის ტერმინოლოგია მის პოზიციას გადმოსცემს და, შესაძლოა, რედაქციის მოსაზრებებს არ ემთხვეოდეს