სროლა დაღესტანში. პროვოკაცია, თუ „ისლამური სახელმწიფოს“ შეტევა?

გამომძიებელთა მონაცემებით, ადამიანი, რომელმაც 18 თებერვალს დაღესტანში მართლმადიდებლური ეკლესიის მრევლის წევრებს ცეცხლი გაუხსნა, 1995 წელს დაბადებული ყიზლარის მაცხოვრებელი იყო. თავდამსხმელის დაკავების მცდელობისას მან სამართალდამცავი ორგანოების ორი წევრი დაჭრა, რის შემდეგაც ის მოკლეს“, – იუწყება რუსეთის საგამოძიებო კომიტეტის ვებგვერდი. ამის შესახებ გვიამბობს „კავკაზსკი უზელი“.

დამნაშავემ მოკლა ოთხი ქალი და მძიმედ დაჭრა ერთი, რომელიც მოგვიანებით საავადმყოფოში გარდაიცვალა. კიდევ ხუთმა ადამიანმა სხვადასხვა სახის დაზიანება მიიღო.

მკვლელი 22 წლის დაღესტნელი ჰალილ ჰალილოვი აღმოჩნდა. РБК-ს ინფორმაციით, რომელიც შინაგან საქმეთა სამინისტროს წყაროებსა და დაღესტნის მთავრობას ეყრდნობა, ერთი წლის წინ ჰალილოვი „ისლამური სახელმწიფოს“ წევრი გახდა. ამ წყაროებმა უარყვეს მანამდე გაჩენილი ინფორმაცია – თითქოს შემთხვევის ადგილზე ორი მსროლელი იმყოფებოდა, და ვითომდა ჰალილოვს თან ახლდა მისი ცოლი, რომელმაც მიმალვა მოახერხა.

„ისლამურმა სახელმწიფომ“ ყიზლარში მომხდარი თავდასხმა უკვე აიღო საკუთარ თავზე, თუმცა ამის დამადასტურებელი არანაირი საბუთი არ წარმოუდგენია. ამის დამამტკიცებელი საბუთი ჯერეჯრობით არც დამოუკიდებელი წყაროებიდან შემოსულა.

ტაძრის წინამძღვრის თქმით, მამაკაცი ეკლესიის კარისკენ გარბოდა შეძახილით – „ალაჰ აკბარ“, და თოფითა და დანით იყო შეიარაღებული, – იუწყება Meduza.

რუსეთის მართლმადიდებელი ეკლესიის წინამძღვარი, პატრიარქი კირილი მომხდარს პროვოკაციად მიიჩნევს. ამის შესახებ მისმა პრეს-მდივანმა ალექსანდრ ვოლკოვმა განაცხადა:

„რუსული ეკლესიის წინამძღვარი დიდი მარხვის დაწყების წინ ჩადენილ ამ საშინელ დანაშაულს პროვოკაციად მიიჩნევს, რომელიც მიზნად ისახავს შუღლის ჩამოგდებას ქრისტიანებსა და მუსლიმებს შორის, რომლებიც კავკასიაში საუკუნეების განმავლობაში მშვიდობიანად თანაარსებობენ.“