სპეცოპერაცია საქართველოს ჯანდაცვის სამინისტროში - დაკავებულია მაღალჩინოსანი
“სააფთიაქო ნარკომანიის” ლობირების გამო საქართველოს სახელმწიფო უსაფრთხოების სამსახურმა (სუს) დღეს ჯანდაცვის სამინისტროს მაღალჩინოსანი – სამედიცინო საქმიანობის სახელმწიფო რეგულირების სააგენტოს უფროსი, გია თვალავაძე დააკავა.
საქმე ეხება „სააფთიაქო ნარკომანიის“ სფეროში ფსიქოტროპული საშუალებების უკანონოდ ბრუნვას.
სუს-ის ანტიკორუფციული სააგენტოს თანამშრომლებს, რომლებიც დღეს დილით ჯანდაცვის სამინისტროში მივიდნენ, სასამართლო განჩინება ჰქონდათ.
სუს-ის განცხადებით, თბილისის და გორის 15 აფთიაქი ფსიქოტროპული საშუალებებით მარაგდებოდა, სადაც ეს წამლები უკანონოდ იყიდებოდა.
დანაშაულში იყვნენ ჩართული აფთიაქების დირექტორები და ფაქტობრივი მფლობელები, რომლებიც მატერიალური სარგებლის მიღების მიზნით, უნებართვოდ, რეცეპტის გარეშე ჰყიდდნენ ფსიქოტროპულ და სპეციალურ კონტროლს დაქვემდებარებულ მედიკამენტებს.
სუს-ის ინფორმაციით, გია თვალავაძე ბოროტად იყენებდა თავის სამსახურებრივ უფლებამოსილებას და ამ “ბიზნესს” ლობირებდა. სწორედ თვალავაძის უწყებას ევალებოდა მსგავს ფაქტებზე რეაგირება.
გამოძიებამ დაადგინა, რომ ცხელ ხაზზე რამდენჯერმე შევიდა შეტყობინება იმის შესახებ, რომ აღნიშნული აფთიაქები ფსიქოტროპულ წამლებს ურეცეპტოდ ჰყიდნენ. ყველა ეს შეტყობინება თვალავაძის უწყებამ რეაგირების გარეშე დატოვა.
სუს-ის ცნობით, აღნიშნულ საქმეზე სულ 20 პირია პასუხისგებაში მიცემული.
შემოსავალი, რომელიც მათ ამ საქმიანობიდან მიიღეს, 4 მილიონ ლარს აჭარბებს, ამბობენ ანტიკორუფციულ სააგენტოში.
• 2014 წლის 1 სექტემბრიდან საქართველოში რეცეპტის გარეშე იკრძალება ფსიქოტროპული, საძილე და სედატიური წამლების გაყიდვა (გარდა იმ პრეპარატებისა, რომლებიც ბალახებზეა დამზადებული). ურეცეპტოდ იკრძალება ასევე ანტიდეპრესანტების, ანტიბიოტიკების და სხვა მრავალი დასახელების წამლის შეძენა.
• ამ აკრძალვის მთავარი არგუმენტი “სააფთიაქო ნარკომანიასთან” ბრძოლა იყო.
• “სააფთიაქო ნარკომანიის “პრობლემა 90-იანი წლებიდან მწვავედ დგას საქართველოში. 2013 წლამდე ნარკომომხმარებელთა დიდი ნაწილი სააფთიაქო ნარკომანიის მომხმარებლები იყვნენ. ექსპერტების თქმით, ბოლო წლებში “სააფთიაქო ნარკომანიის” მასშტაბებმა მნიშვნელოვნად იკლო.
• ამ აკრძალვის მიუხედავად, სოციალურ ქსელებში პერმანენტულად ჩნდება ინფორმაცია იმის შესახებ, რომ ამა და ამ აფთიაქში ურეცეპტოდ ჰყიდიან ფსიქოტროპულ პრეპარატებს. ამ თემაზე რამდენიმე ჟურნალისტური გამოძიებაც ჩატარდა, სადაც გამოჩნდა, რომ თბილისის ზოგიერთ აფთიაქში (და არა ყველაში) უპრობლემოდ ყიდიან მედიკამენტებს, რომლებსაც რეცეპტი სჭირდება.
