სომხეთში ევროკავშირის ელჩი ცენტრალური საარჩევნო კომისიის შეცვლის მოწოდებით გამოდის, რათა კომისიის მიმართ მეტი ნდობა გაჩნდეს

foto: verelq.am

ისე უნდა მოხდეს, რომ სომხეთის ცენტრალური საარჩევნო კომისიის მიმართ მეტი ნდობა გაჩნდეს, – განაცხადა სომხეთში ევროკავშირის დელეგაციის ხელმძღვანელმა პიოტრ სვიტალსკიმ.

„ცენტრალური საარჩევნო კომისიის შემადგენლობაში  საზოგადოების წარმომადგენლები უნდა შევიდნენ და ა.შ. სომხებს ვურჩევდი: იფიქრეთ, შეისწავლეთ ცენტრალური საარჩევნო კომისიის შემადგენობის საკითხი, და ისიც, თუ როგორ გახდეს ეს კომისია უფრო საიმედო და მოსახლეობის მეტი ნდობა დაიმსახუროს“, – აღნიშნა დიპლომატმა.

ევროკავშირის წარმოამდგენლის განცხადებაზე სომხეთის ხელისუფლების რეაქციამ არ დააყოვნა. იუსტიციის მინისტრმა დავიდ არუთუნიანმა ჟურნალისტებს განუცხადა, რომ ცენტრალური საარჩევნო კომისიის შემადგენლობის შეცვლა ან შენარჩუნება საშინაო საკითხს წარმოადგენს, რაც ქვეყნის ეროვნულმა საკრებულომ უნდა გადაწყვიტოს.

„ვფიქრობ, ეს არის ჩვენს საშინაო პოლიტიკაში ჩარევის პირადაპირი მცდელობა, რაც დაუშვებლად მიმაჩნია, იმისგან დამოუკიდებლად, სასიკეთო მიზნებით ხდება ეს თუ არა“, – აღნიშნა დ. არუთუნიანმა.

პიოტრ სვიტალსკიმ სომხეთში ჩატარებული არჩევნების შესახებაც  გამოთქვა აზრი, და აღნიშნა, რომ ეს არ იყო იდეალური არჩევნები, და ქვეყანას სრულყოფილი დემოკრატიული სტანდარტებისთვის ჯერ არ მიუღწევია. „პროცესი ჯერ კიდევ მიმდინარეობს. შეიძლება ითქვს, რომ უკვე ნახევარი გზა გავლილია“, – განაცხადა ელჩმა და დასძინა, რომ სომხეთის მიერ განვლილ გზას, სხვა ქვეყნებთან შედარებით, დადებითად მიიჩნევს.

ელჩმა იმედი გამოთქვა, რომ 2-3 წელიწადში, როდესაც სომხეთი მომავალ არჩევნებს მიუახლოვდება, ქვეყანაში სერიოზული ცვლილებები მოხდება. მან აზრი  გამოთქვა ახალი საარჩევნო კოდექსის თაობაზეც, რომელიც ხელისუფლებისა და ოპოზიციის კონსენსუსის შედეგად ჩამოყალიბდა.

„პროსახელისუფლებო ძალები ცდილობენ, რომ საარჩევნო კოდექსი თავიანთ პოლიტიკურ მიზნებს მოარგონ, ყველაზე დემოკრატიულ ქვეყნებშიც კი ეს ბუნებრივი ინსტინქტია. გამოიყენება  მმართველი პარტიის სასრგებლო ელემენტები“, – თქვა ელჩმა.

ამასთან დაკავშირებით იუსტიციის მინისტრმა ასევე აღნიშნა, რომ ელჩი საკუთარ პოზიციებს არ  უნდა გამოთქვამდეს: „ჩემი აზრით, ეს ასევე პოლიტიკური საკითხია, რომლის თაობაზეც აზრს, ელჩები კი არა, შესაბამისი სპეციალისტები გამოთქვამენ. და მოცემულ სფეროში უმაღლესი ორგანოა ვენეციის კომისია, რომელმაც ამ საკითხთან დაკავშირებით თავისი დასკვნა უკვე გააკეთა“.