სომხეთში ოპოზიციონერს თავისუფლების 10 წლით აღკვეთა მიუსაჯეს

ფოტო: azatutyun.am

ოპოზიციონერ ჟირაირ სეფილიანს დღეს, სასამართლოს გადაწყვეტილებით, 10 წლისა და 5 თვის ვადით პატიმრობა მიესაჯა.

ის დაახლოებით ორი წელია, პატიმრობაში იმყოფება იარაღის არალეგალურად შეძენის, ტრანსპორტირებისა და შენახვის ბრალდებით.

სასამართლომ ძიების პროცესში დადასტურებულად მიიჩნია, რომ სომხების გენოციდის 100 წლისთავისადმი მიძღვნილი ღონისძიებების დროს სეფილიანი მასობრივ არეულობებს ამზადებდა. ასევე მას წარდგენილი აქვს ბრალდება ხელისუფლების წარმომადგენლის მიმართ ძალადობისა და შეიარაღებული წინააღმდეგობის გაწევისთვის და ქონების განადგურებისთვის. მას ინკრიმირებული აქვს აგრეთვე 2015 წელს, საკონსტიტუციო რეფერენდუმის წინ, სტრატეგიული მნიშვნელობის შენობის დაპყრობისა და ხელისუფლებისთვის გარკვეული ქმედებების იძულების მიზნით, იარაღისა და საბრძოლო მასალების შეძენა.

ბრალდებაში აღნიშნულია, რომ ჟირაირ სეფილიანმა, „მისგან დამოუკიდებელი მიზეზების გამო, თავისი დანაშაულებრივი ჩანაფიქრები ბოლომდე ვერ მიიყვანა“.

განაჩენის გამოცხადების დროს, მას შემდეგ, რაც სეფილიანმა 10-წლიანი პატიმრობის შესახებ გაიგო, მან მოსამარლთეს ტაში დაუკრა და წამოიძახა:

 „ბრავო! მალე მსგავს განაჩენს თქვენც წაგიკითხავენ!“

ოპოზიციონერს თავის საქმეზე ჩვენება არ მიუცია, მან სასამართლოში თავი ვერ დაიცვა, ხოლო განაჩენის გამოცხადების დღეს უკანასკნელი განცხადებით გამოსვლა ვერ შეძლო.

მოსამართლე ტატევიკ გრიგორიანმა მას მჯდომარე მდგომარეობაში ლაპარაკის უფლება არ მისცა. განხილვაში, რომელიც ათ თვეზე მეტ ხანს გრძელდებოდა, სეფილიანს ძირითადად მონაწილეობა არ მიუღია, რადგან მოსამართლე მას სხდომათა დარბაზიდან აძევებდა, და მოითხოვდა, რომ მას სასამართლოს წინაშე ფეხზე მდგომს ელაპარაკა. სეფილიანი ამ მოთხოვნის შესრულებაზე უარს აცხადებდა და ამით სასამართლო სისტემისადმი თავის დამოკიდებულებას ავლენდა.

ადვოკატებისა და უფლებადამცველების შეფასებით, მთელი სასამართლო პროცესი უხეში დარღვევებით მიმდინარეობდა. მოსამართლე ტატევიკ გრიგორიანი, ბრალდებულისა და მისი ადვოკატის გარდა, სანქციებს იყენებდა სეფილიანის მხარდამჭერების მიმართაც, რომლებიც განხილვაში მონაწილეობდნენ.

ჟირაირ სეფილიანის ადვოკატმა აირიკ პაპიკიანმა განაცხადა:

 „ეს სასამართლო განხილვა არ იყო, არამედ – ღია პოლიტიკური დაკვეთა და ანგარიშსწორება. 20 მარტი მართლმსაჯულების სიკვდილის დღედ უნდა გამოცახდდეს, ამ დღეს სასამართლოების თავზე დროშები უნდა დაეშვას და შავი ლენტები დაიკიდოს. ეს დღე ისტორიაში დარჩება, მაგრამ დრო მოვა, როდესაც პოლიტიკური ხელისუფლება ამისთვის პასუხს აგებს“. 

თავად ჟირაირ სეფილიანმა მანამდე განაცხადა, რომ ეს განხილვა კი არა, მის მიმართ ანგარიშსწორება, პოლიტიკური წარმოდგენა და თეატრალური დადგმა იყო.

JAMnews თავის დროზე აქვეყნებდა ინფორმაციას იმის შესახებ, თუ როგორ დაიპყრო შეიარაღებული ადამიანების ჯგუფმა 2016 წლის 17 ივლისს პოლიციის საპატრულო საგუშაგო სამსახურის პოლკის ტერიტორია ჟირაირ სეფილიანის გათავისუფლების მოთხოვნით.

სეფილიანის მომხრეები მის მოყვანას მოითხოვდნენ, და აცხადებდნენ, რომ მხოლოდ მის ბრძანებებს შეასრულებდნენ. გარდა ამისა, ჯგუფის წევრები მოითხოვდნენ პრეზიდენტ სერჟ სარგსიანის გადადგომას. ამ მოთხოვნას მოსახლეობის ნაწილმაც დაუჭირა მხარი და პარალელურად საპროტესტო აქციები დაიწყო.

ორი კვირის შემდეგ შეიარაღებული დაჯგუფების წევრებმა განაცხადეს, რომ ნებდებიან  „სამხედრო ტყვეების“ სტატუსით, პოლიციასთან შეტაკებისა და იმ ადამიანების სისიხლის დაღვრის თავიდან არიდების მიზნით, „რომლებსაც რეჟიმთან ცოტა რამ აკავშირებთ“. პოლიციის საგუშაგო-საპატრულო სამსახურის პოლკის დაპყრობის საქმეზე სასამართლო განხილვა გრძელდება.