სომხეთის პრემიერ-მინისტრმა თურქეთთან დიპლომატიური ურთიერთობების დამყარებისთვის მზადყოფნის შესახებ განაცხადა

სომხეთის ხელმძღვანელობის პოზიცია რაიმე წინასწარი პირობების გარეშე თურქეთთან ურთიერთობის მოგვარების შესახებ ისტორიულ შესაძლებლობას წარმოადგენს. სომხეთის მედია თურქეთის ოპოზიციური რესპუბლიკური სახალხო პარტიის ხელმძღვანელის მუსატაფა სარიგიულის შეხედულებას ციტირებს:

 „სომხეთის პრემიერ-მინისტრმა ნიკოლ ფაშინიანმა თქვა, რომ ისინი მზად არიან წინასწარი პირობების გარეშე დაამყარონ თურქეთთან დიპლომატიური ურთიერთობა. სომხეთის მიერ გამოწვდილი ხელი ისტორიულ შესაძლებლობად უნდა მივიჩნიოთ“.

თურქოლოგმა ასტხიკ იგიტიანმა JAMnews-ს განუცხადა, რომ სომხეთის პრემიერის განცხადება, რომელმაც ტელეარხ Al-Jazeera-სთვის მიცემულ ინტერვიუში გაიჟღერა, ისევ თურქული მედიის ყურადღების ცენტრშია, თუმცა ის რამდენიმე დღის წინათ გამოქვეყნდა:

 „პრაქტიკულად ყველა ცნობილმა გამოცემამ ყურადღება მიაპყრო სომხეთ-თურქეთის ურთიერთობებს და ფაშინიანის განცხადების შესახებ აუწყა. ძირითადად, ეს ახალი ამბების ხასიათის მასალებია, თუმცა სათაურებში დამოკიდებულება ჩანს. მაგალითად, „მნიშვნელოვანი გზავნილი სომხეთიდან“, ან „მოულოდნელი განცხადება თურქეთიდან“. თუმცა, ოფიციალური რეაქცია არ არის.  ის, შესაძლოა, მოგვიანებით გაჩნდეს, მედიაში არსებული პუბლიკაციების საფუძველზე.

თურქოლოგი ყურადღებით ადევნებს თვალს მეზობელ ქვეყანაში არსებულ სიტუაციას, და ამბობს, რომ მუსტაფა სარიგიულის პოზიცია სოციალური ქსელების ბევრ თურქ მომხმარებელს არ მოეწონა:

  „დიდ ნაწილს ძალიან მწვავე რეაქცია ჰქონდა. სომხეთთან ურთიერთობის მოგვარების მოწინააღმდეგეები ამბობენ, რომ ჯერ ყარაბაღის საკითხი უნდა გადაწყდეს“.

ერევანსა და ანკარას შორის ურთიერთობას რომ მესამე ქვეყანა განაპირობებს, ამას ნიკოლ ფაშინიანიც აღიარებს. და მაინც, იმავე ინტერვიუში გამოთქმული სხვა მოსაზრებებიდან გამომდინარე, სომხეთის პრემიერ-მინისტრი თურქეთთან ურთიერთობების მოგვარების მომხრეა:

 „თურქეთმა სომხეთსა და თურქეთს შორის საზღვარი ჩაკეტა, სომხეთის მხრიდან ის, შეიძლება, გახსნილად ჩითვალოს“.

ფაშინიანმა ორ ქვეყანას შორის დიპლომატიური ურთიერთობების დამყარებისთვის ხელის შემშლელ სხვა ასპექტზეც ილაპარაკა:

„ჩვენთვის ძალიან მნიშვნელოვანია სომეხთა გენოციდის საერთაშორისო აღიარება (საუბარია გასული საუკუნის დასწყისში ოსმალეთის იმპერიაში მომხდარ მოვლენებზე – JAMnews), და სომხეთი გენოციდების წინააღმდეგ ერთ-ერთი აქტიური მებრძოლია. გენოციდის საკითხი ჩვენი ქვეყნისთვის არა იმდენად სომხეთ-თურქეთის ურთიერთობის საკითხია, რამდენადაც გენოციდის წინააღმდეგ გლობალური ბრძოლის“.

პუბლიკაციის ტერმინები, ტოპონიმები, აზრები და იდეები აუცილებელი არ არის, რომ JAMnews-ის ან მისი ცალკეული თანამშრომლების აზრებსა და იდეებს ემთხვეოდეს. JAMnews უფლებას იტოვებს, წაშალოს პუბლიკაციებისთვის დართული ისეთი კომენტარები, რომლებიც შეურაცხმყოფელად, მუქარის შემცველად, ძალადობისკენ მოწოდებად ან რაიმე სხვა მიზეზით ეთიკურად მიუღებლად შეფასდება.