სომხეთის და აზერბაიჯანის საგარეო საქმეთა მინისტრების შეხვედრა ნიუ იორკში: მთავარი შედეგები
აზერბაიჯანის საგარეო საქმეთა მისნისტრმა ელმარ მამედიაროვმა სომეხ კოლეგასთან, ედვარდ ნალბანდიანთან და მინსკის ჯგუფის წევრებთან შეხვედრისას „ყარაბაღის კონფლიქტის დარეგულირების საკითხში შუამავლების ზოგიერთ წინადადებებს მხარი დაუჭირა“. ამის შესახებ რუსულ სააგენტო „ნოვოსტისთან“ საუბარში აზერბაიჯანის საგარეო უწყების პრეს-მდივანმა ჰიკმეტ გაჯიევმა განაცხადა.
თუმცა, კონკრეტულად რომელი წინადადებები მოიწონა ბაქომ, გაჯიევს არ დაუზუსტებია.
სომხეთის და აზერბაიჯანის საგარეო საქმეთა მინისტრების შეხვედრა ნიუ იორკში 23 სექტემბერს შედგა. ორივე დიპლომატი აშშ-ში გაეროს გენერალური ასამბლეის 72-ე სესიაში მონაწილეობის მისაღებად ჩავიდა.
მინისტრების შეხვედრა ეუთოს მინსკის ჯგუფის თანათავმჯდომარეების მიერ იყო ორგანიზებული. თავდაპირველად მინსკის ჯგუფის წევრები ედვარდ ნალბანდიანს და ელმარ მამედიაროვს ცალ-ცალკე შეხვდნენ, რის შემდეგაც ერთობლივი შეხვედრა გაიმართა.
თანათავმჯდომარეების განცხადებაში ნათქვამია:
„საუბრის მთავარი თემა იყო კონფლიქტის ზონაში დღეს არსებული სიტუაცია, მოლაპარაკებების პროცესის გააქტიურების გზების გამონახვა, და აზერბაიჯანისა და სომხეთის პრეზიდენტების შეხვედრის მომზადება. თანათვმჯდომარეები იმედოვნებენ, რომ ეს შეხვედრა მხარეებს შორის ნდობას გაზრდის, და ისინი საკვანძო საკითხებში კომპრომისული გადაწყვეტილებების მისაღებად პოლიტიკურ ნებას გამოიჩენენ“.
შეგახსენებთ, რომ სერჟ სარგსიანი და ილჰამ ალიევი ერთმანეთს ბოლოს 20 ივნისს რუსეთის პრეზიდენტის ვლადიმირ პუტინის შუამავლობით სანკტ-პეტერბურგში შეხვდნენ.
სომხეთის საგარეო საქმეთა სამინისტროს წარმომადგენლებს ჯერ ამ შეხვედრის შესახებ კომენტარები არ გაუკეთებიათ.
