საქართველო: ტურისტები აღარ ჩამოდიან, სასტუმროები გაკოტრების პირას არიან

ბოლო ექვსი დღის განმავლობაში, კორონავირუსის გამო, სასტუმროებს ჯავშნების 90 პროცენტამდე გაუუქმდათ, – ასეთ განცხადებას აკეთებენ საქართველოს ტურიზმის ინდუსტრიის წარმომადგენლები საგანგებო შეხვედრაზე, რომელიც ახალი კორონავირუსის გამო შექმნილი სიტუაციის ანალიზს მიეძღვნა.

• 2-წუთიანი ვიდეო იმის შესახებ, თუ როგორ უნდა დავიცვათ თავი კორონავირუსისგან

•კორონავირუსი: ეპიდსიტუაცია საქართველოში – 3 მარტი

• კორონავირუსი: როგორი სურათია მსოფლიოში 3 მარტს. ძირითადი ფაქტები და რიცხვები

• კორონავირუსი საქართველოშია. რა ელის ქართულ ეკონომიკას?

როგორც სასტუმროების და რესტორნების ფედერაციის თავმჯდომარე, შალვა ალავერდაშვილი ამბობს, კორონავირუსის გამო პირველი დარტყმა სწორედ საქართველოს ტურიზმის ინდუსტრიამ მიიღო.

„ბოლო 5-6 დღის განმავლობაში, ჯავშნების 80-90 პროცენტი ყველას გაუუქმდა მარტი-აპრილის თვეზე. ეს ნიშნავს, რომ ინდუსტრია თითქმის გაბანკროტების ზღვარზეა. არ ვიცი, ხვალ რა იქნება. კორონავირუსი გლობალური პრობლემაა და არავის ბრალი არ არის. ეს გლობალური თემაა და არავის დადანაშაულებას არ ვაპირებთ. უბრალოდ, ახლა უნდა მოვიფიქროთ გამოსავალი ამ სიტუაციიდან, რა უნდა გავაკეთოთ იმისთვის, რომ პერსონალი არ გავუშვათ სამსახურებიდან“, – განაცხადა ალავერდაშვილმა.

განსაკუთრებით ინტენსიურად ჯავშნების გაუქმება მას შემდეგ დაიწყეს, რაც 26 თებელრავს საქართველოში ახალი კორონავირუსის პირველი შემთხვევა დაფიქსირდა.

მისი შეფასებით, ყველაზე დიდი დარტყმა თბილისმა მიიღო, რადგან რეგიონების დიდ ნაწილში ტურისტული სეზონი ან უკვე დასრულდა, ან ჯერ არ დაწყებულა, რაც  მათ მდგომარეობას ამსუბუქებს.

“მარტიდან იწყებოდა თბილისში სეზონის გამოცოცხლება, განსაკუთრებით ბევრი ტურისტი მარტში მუსულმანური ქვეყნებიდან ჩამოდიოდა, რადგან ნოვრუზ ბაირამის დღესასწაულია იქ და ადამიანები ისვენებენ,” – ამბობს ალავერდაშვილი.

ალავერდაშვილის თქმით, კრიზისი თუ გაგრძელდება და ტურისტები აღარ ჩამოვლენ, სასტუმროები იძულებულნი იქნებიან შტატები შეამცირონ. ტურისტულ სექტორში კი, საქართველოში 100 ათას ადამიანებმდეა დასაქმებული.

“მე ვუთხარი ჩემს თანამშრომლებს, ყველაფერი გვექნება გამჭვირვალედ… რაც გვექნება გადასახდელი, მაგალითად კომუნალურები, გადავიხდით, თუ დაგვრჩება რამე თანხა, გავანაწილებთ ხელფასებზე, ზოგს შეიძლება, 100 ლარი შეხვდეს, ზოგს – 200 ლარი, ზოგს შესაძლოა, არაფერი შეხვდეს. თუმცა ამ წუთში ჩემი თანამშრომლები უხელფასო შვებულებაში არიან და ეს არის ჩვენთვის მართლაც ფორსმაჟორული მდგომარეობა. წარმოიდგინეთ, რა ძნელია 250 ადამიანთან საუბარი, რომლებსაც ეუბნები, რომ ვერ გადაგიხდით ხელფასს და თუ გინდათ, იარეთ” – ამბობს ალავერდაშვილი.

მისი თქმით, სექტორს კარგად ესმის, რომ ეს არავის ბრალი არ არის და გლობალური პრობლემაა, თუმცა, სექტორი ითხოვს დახმარებას და კონკრეტულ გეგმას ხელისუფლებისგან.

„პირველი თემა იქნება ბანკებთან ურთიერთობა, ყველაზე რთული ამ წუთას არის ბანკები, სესხები დაფარვა, არ ვიცი, როგორ და რა რესურსით დავფარავთ. შემდეგი იქნება ასევე ქონების გადასახადის გადახდა, აქაც არ ვიცით, რა იქნება და როგორ“, – განაცხადა შალვა ალავერდაშვილმა.