საქართველო-აზერბაიჯანის საზღვარზე დაკავებულია ოპოზიციური პარტიის თავმჯდომარის მოადგილე

25 მაისს საღამოს საქართველოდან დაბრუნების დროს საბაჟო პუნქტზე ოპოზიციური პარტიის, აზერბაიჯანის სახალხო ფრონტის თავმჯდომარის მოადგილე გიოზალ ბაირამლი (Gözəl Bayramlı) დააკავეს.

ეს ინფორმაცია პირველად თავის ფეისბუკის სტატუსით გაავრცელა პარტია აზერბაიჯანის სახალხო ფრონტის ლიდერმა ალი ქერიმლიმ. “ბაირამლის ჩანთაში რაღაც ჩაუდეს და დააკავეს”. ამის შესახებ მან ქერიმლისთვის ტელეფონით თქმა მოასწრო.

ბაირამლი ბოლო ხანს ხშირად მიემგზავრებოდა საქართველოში სამკურნალოდ.

ქერიმლიმ ხელისუფლებას მიმართა და მოუწოდა მათ, რომ ბრძოლა კაცურად წარმართონ: “ქალის წინააღმდეგ ასეთ არაკაცურ მეთოდებს მაინც ნუ მიმართავთ. ამით წითელ ხაზს კვეთავთ. გახსოვდეთ, ამ ყველაფრისთვის პასუხს აგებთ!” – გადმოსცემს ქერიმლის სიტყვებს აზერბაიჯანში დაბლოკილი ვებგვერდი “მეიდან ტვ”.

“მიმდინარეობს სახელმწიფო უშიშროების თანამშრომლების მიერ გიოზალ ბაირამლის დაკითხვა”, – იუწყება სამართალდამცავი ოგტაი გულალიევი. “არაოფიციალური ინფორმაციით, მას ჩანთაში 10 ათასი ყალბი აშშ დოლარი აღმოაჩნდა”, – წერს გულალიევი თავის ფეისბუკის სტატუსში.

“ინციდენტის ადგილას ჩასული აზერბაიჯანის უზენაესი მეჯლისის პარტია სახალხო ფრონტის თავმჯდომარე ნურედინ მამედლი იტყობინება, რომ ბოლო მონაცემებით, ბაირამლი გადაიყვანეს ქალაქ შამკირში, სადაც სასაზღვრო ჯარის შტაბი მდებარეობს. “როგორც ჩანს, მისთვის კონტრაბანდის შეტანის ინკრიმინირებას აპირებენ”, – გადმოსცემს მამედლის სიტყვებს აზერბაიჯანში დაბლოკილი მეორე ვებგვერდი “რადიო აზალდიგი”.