საქართველოში დემირელის სახელობის კოლეჯის მმართველი დააკავეს - ბრალდება ტერორიზმის ხელშეწყობაა

საქართველოში “შაჰინის სკოლა-ლიცეუმის” ყოფილი დირექტორი, ასევე დემირელის სახელობის კოლეჯის ერთ-ერთი მმართველი 24 მაისს დააკავეს. მუსტაფა ჩაბუკის დაკავების მიზეზი თურქეთის მხარის მოთხოვნა და ტერორისტულ ორგანიზაცია “ფეტოსთან” კავშირის ბრალდებაა.

25 მაისს ჩაბუქს თბილისის საქალაქო სასამართლომ 3-თვიანი წინასაექსტრადაციო პატიმრობა შეუფარდა. სასამართლომ პროკურატურის შუამდგომლობა დააკმაყოფილა, რომელმაც ჩაბუქს ბრალად შეიარაღებული ტერორისტული ორგანიზაციის წევრობა წაუყენა. პროკურატურის თქმით, მუსტაფა ჩაბუქი თავს არიდებს გამოძიებას და თურქული მხარისგან მიწოდებული მასალების თანახმად, მიმალვაში იმყოფება.

მუსტაფა ემრე ჩაბუკის ადვოკატი სოსო ბარათაშვილი ამბობს, რომ გარდა მისი დაცვის ქვეშ მყოფი პირისა საქართველოში სხვა თურქი ბიზნესმენებიც არიან დაკავებულები. ბარათაშვილის თქმით, საუბარია იმაზე, რომ თითქოს, ჩაბუკი დემირელის სახელობის კოლეჯის ტერორისტული ორგანიზაციისთვის გადაცემას ცდილობდა.

მუსტაფა ჩაბუკის ადვოკატის განმარტებით კი, ამერიკული ორგანიზაცია, რომლისთვისაც, სავარაუდოდ, სკოლის გადაცემა იგეგმებოდა, ტერორისტული ორგანიზაციების სიაში არ არის და გაუგებარია, რა გახდა ჩაბუკის დაკავების მიზეზი.

დემირელის კოლეჯი, ისევე როგორც ჩაღლარის განათლების ქსელის რამდენიმე საგანმანათლებლო დაწესებულება საქართველოში, ფეთჰულა გიულენის სახელთანაა დაკავშირებული, რომელსაც 2016 წლის 15 ივლისს თურქეთში მომხდარი სამხედრო გადატრიალება ჰბრალდება. თურქეთის მთავრობამ გიულენის მიერ თურქეთში გახსნილ შაჰინის სკოლებზე პირდაპირი იერიში მიიტანა და განაცხადა, რომ იქ “ტერორისტებს ზრდიან”.

ინფორმაცია ჩაბუკის დაკავების შესახებ მისმა მეუღლემ თუბა ჩაბუკმა სოციალურ ქსელში გაავრცელა. მან საქართველოს პრეზიდნტს და პრემიერმინისტრს 24 მაისს მიმართა და სთხოვა, რომ არ გადასცენ მისი მეუღლე თურქეთს.

“მიზეზი, სავარაუდოდ, თურქეთიდან მოდის, გუშინ თურქეთის დელეგაცია იმყოფებოდა საქართველოში და სწორედ ამ ვიზიტის შემდეგ, დღეს დილით დააკავეს ჩემი მეუღლე. გამომძიებლებმაც მითხრეს, რომ ქართული მხარე მუსტაფას სამართლებრივად არაფერს ედავება”, – განაცხადა თუბა ჩაბუკმა.

საქართველოს შინაგან საქმეთა სამინისტრო მუსტაფა ჩაბუკის დაკავებაზე ჯერ კომენტარს არ აკეთებს.

თურქეთის პრემიერმინისტრი და მინისტრთა კაბინეტი საქართველოს 22-23 მაისს სტუმრობდნენ. მხარეები რამდენიმე, მათ შორის სამართლებრივ საკითხებთან დაკავშირებით თანამშრომლობაზე შეთანხმდნენ.