ყოფილმა მთავარმა პროკურორმა ქვეყნის გენერალურ აუდიტორს ღამის კლუბში სცემა

საქართველოს სახელმწიფო აუდიტის სამსახურის ხელმძღვანელს ლაშა თორდიას თავს ყოფილი პროკურორი ოთარ ფარცხალაძე დაესხა. ამის შესახებ თავად დაზარალებული საუბრობს.

შემთხვევა 12 მაისის ღამით თბილისში ერთერთ ღამის კლუბში მოხდა. ლაშა თორდიას თქმით, ამის მიზეზი ერთ-ერთი საქმეა, რომელსაც აუდიტის სამსახური სწავლობს და სადაც ოთარ ფარცხალაძე ფიგურირებს.

”შეხვედრის დროს აგრესიული ტონით მითხრა, რატომ ვაგროვებდი მასზე კომპრომატებს, ასევე როგორ ვაპირებდი ცხოვრების გაგრძელებას ვადის გასვლის შემდგომ. ვუპასუხე, რომ ასე ესაუბრა მასთან, ვისთანაც ამის საშუალება ჰქონდა. ამ დროს ზედმეტი აგრესია გამოხატა და დამარტყა ხელი, რასაც მისი თანხმლები პირების მხრიდანაც მოჰყვა თავდასხმა. ადამიანს აქვს სრული დაუსჯელობის განცდა, ვინაიდან ამ კლუბში, ძალიან ბევრი ადამიანი იმყოფებოდა და ამ ადამიანების თვალწინ მოხდა ეს ყველაფერი”, – განაცხადა აუდიტის სამსახურის უფროსმა.

საქმის შესახებ, სადაც ოთარ ფარცხალაძე ფიგურირებს, აუდიტის სამსახური ინფორმაციის გავრცელებას 15 მაისს გეგმავს.

ლაშა თორდიაზე თავდასხმაზე შინაგან საქმეთა სამინისტრომ გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.