საქართველოს საზღვარზე დაკავებული აზერბაიჯანელი ჟურნალისტი გათავისუფლებულია

აზერბაიჯანი-საქართველოს საზღვრის გადაკვეთისას დაკავებული აზერბაიჯანელი ჟურნალისტი კამრან მაჰმუდოვი, რომელიც რამდენიმე ოპოზიციურ მასობრივ საინფორმაციო საშუალებასთან თანამშრომლობდა, გათავისუფლებულია.

ჟურნალისტი დილის ხუთ საათზე საკონტროლო-გამშვებ პუნქტზე, პასპორტის შემოწმებისას დააკავეს, და გაზახის რაიონის პოლიციის განყოფილებაში გადაიყვანეს.

ადგილზე მისულმა ადვოკატმა ჯავად რზაზადემ ფეისბუკში დაწერა, რომ მესაზღვრეების თქმით, მაჰმუდოვი იმიტომ დააკავეს, რომ ის “ძებნაში იმყოფება”. ადვოკატმა დასძინა, რომ მაჰმუდოვს აღმოაჩნდა 127 მანათი, პლასტიკური ბარათები და სხვა პირადი ნივთები. ჩხრეკა ადვოკატებისა და მოწმეების გარეშე ჩატარდა.

რამდენიმე საათის შემდეგ პოლიციის თანამშრომლებმა ადვოკატს განუცხადეს, რომ მაჰმუდოვი 2017 წლის 27 აპრილს შინაგან საქმეთა სამინისტროს მიერ გაცემული ბრძანების საფუძველზეა დაკავებული, და რომ ის იმ პირთა სიაშია, რომლებსაც ქვეყნიდან გასვლა ეკრძალებათ. მიზეზები, რომელთა გამოც მაჰმუდოვი ამ სიაში მოხვდა, არ განუმარტავთ.

ჟურნალისტი 12.15 გაათავისუფლეს და მას ბაქოში დაბრუნება ურჩიეს.

“ბევრი რამ დარჩა ჩემთვის გაუგებარი. არ ვიცი, რით არის გამოწვეული ჩემი დაკავების ბრძანება. ჩვენს ქვეყანაში ჟურნალისტებისადმი “ყურადღების” ფაქტორს თუ გავითვალისწინებთ, ყველაფერი მოსალოდნელია”, – განუცხადა გათავისუფლების შემდეგ მაჰმუდოვმა სააგენტო “ტურანს”.

ჟურნალისტმა დასძინა, რომ მას ამოღებული ნივთები – ფული და საბუთები დაუბრუნეს. მაჰმუდოვი აპირებს, რომ მისთვის ქვეყნიდან გასვლის აკრძალვის მიზეზის გასარკვევად სასამართლოს მიმართოს.

კამრან მაჰმუდოვი ცნობილი გახდა როგორც დღეს უკვე დახურული რადიოარხის “ANS-ÇM“-ის წამყვანი. ის ასევე თანამშრომლობდა აზერბაიჯანის ტერიტორიაზე დაბლოკილ “რადიო აზალდიგთან” და ინტერნეტ-ტელევიზია “არხი-13”-თან. ქვეყნიდან გასვლის უფლების არმქონე პირთა სიაში მისი შეტანის დრო იმის ვარაუდის საფუძველს იძლევა, რომ მაჰმუდოვი არასასურველ ადამიანად სწორედ “არხი-13”-ის საქმის გამო იქცა; ამ არხის დირექტორი აზიზ ორუჟდევი დაახლოებით იმავე დროს დააპატიმრეს.

“არხი-13”-ის დირექტორის აზიზ ორუჟდევის დაპატიმრების შესახებ შეგიძლიათ JAMnews-ის სიახლეებში, აქ წაიკითხოთ.
https://jam-news.net/?p=35572&lang=ka