საქართველოს პირველი პრეზიდენტის შვილი, ცოტნე გამსახურდია თბილისში დაჭრეს
ინციდენტი 19 დეკემბერს, საღამოს, თბილისის ცენტრში, იმ სახლთან მოხდა, სადაც ადრე საქართველოს პრეზიდენტი, ზვიად გამსახურდია ცხოვრობდა.
პირველი პრეზიდენტის შვილი, ცოტნე გამსახურდია საავადმყოფოში უგონო მდგომარეობაში მიიყვანეს. მას მკერდსა და თავში, რამდენიმე ჭრილობა აქვს მიყენებული.
ექიმებმა ორი უმძიმესი ოპერაცია ჩაატარეს – ერთი გულისა და ფილტვის არეში, მეორე კი თავზე. მდგომარეობა ამ დრომდე უკიდურესად მძიმედ ფასდება.
თავდამსხმელმა მიმალვა მოახერხა. პოლიცია ჯერჯერობით არ ამბობს, ვინ დაესხა თავს ცოტნე გამსახურდიას.
შსს-მ უკვე დაიწყო გამოძიება საქართველოს სისხლის სამართლის კოდექსის 19-108-ე – განზრახ მკვლელობის მცდელობის მუხლით.
ერთ-ერთი ვერსიით, თავდამსხმელი ცოტნე გამსახურდიას მეზობელი იყო, რომელთანაც მას ათი წლის წინ მოუვიდა კონფლიქტი. 2011 წლის აპრილში, გამსახურდია დამნაშავედ სცნეს დავით ბაჯელიძის დაჭრაში, რის გამოც, ცხრა წლითა და ექვსი თვით თავისუფლების აღკვეთა მიუსაჯეს.
ერთი-ერთი გამოცემა ანონიმურ წყაროზე დაყრდნობით წერს, რომ ეს შურისძიება იყო.
ზოგიერთი მიმომხილველი არ გამორიცხავს, რომ მომხდარი ცოტნე გამსახურდიას ოპოზიციურ საქმიანობას უკავშირდებოდეს. ინციდენტამდე რამდენიმე საათით ადრე, გამსახურდიამ ფეისბუკის საკუთარ გვერდზე, კრიტიკის ქარცეცხლი დაატეხა და უცენზუროდ მოიხსენია საქართველოს პრემიერ-მინისტრის მრჩეველი რეგიონულ საკითხებში, სოზარ სუბარი.
• 2019 წლის დეკემბერში, ცოტნემ და მისმა ძმამ, კონსტანტინემ შიმშილობა გამოაცხადეს მათი მამის გარდაცვალების საქმის გამოძიების ბოლომდე მიყვანის მოთხოვნით.
• ზვიად გამსახურდია საქართველოს პრეზიდენტი იყო 1991-1992 წლებში, სულ რაღაც ცხრა თვე. 1992 წლის იანვარში, ის შეიარაღებული გადატრიალების შედეგად დაამხეს. გამსახურდია საქართველოდან გაიქცა და დევნილობაში იმყოფებოდა. ის 1993 წლის ბოლოს, სოფელ ძველ ხიბულაში, გაურკვეველ ვითარებაში გარდაიცვალა.
