საქართველოს პატრიარქს გერმანიაში ოპერაცია უტარდება

სრულიად საქართველოს ქათოლიკოს-პატრიარქი საოპერაციოდ შეიყვანეს. ინფორმაციას  ამის შესახებ ტელეკომპანია “რუსთავი 2” ავრცელებს. პატრიარქს ოპერაცია ნაღვლის ბუშტზე, ლაპარასკოპიური მეთოდით ბერლინში, Helios Berlin bux-ის კლინიკაში უტარდება.

ტელეკომპანია “რუსთავი 2”-ის ინფორმაციით, თბილისის საერთაშორისო აეროპორტში, პარასკევს გამთენიისას საპატრიარქოს ქონების განკარგვის სამსახურის ხელმძღვანელი მამა გიორგი მამალაძე დააკავეს, რომელიც ბერლინში პატრიარქის მოსანახულებლად მიემგზავრებოდა. ტელეკომპანიისვე ცნობით, საქმე სავარაუდოდ, პატრიარქის მოწამვლის მცდელობას ეხება, თუმცა, აღნიშნული ინფორმაცია ჯერ ოფიციალურად დადასტურებული არ არის.

მამა გიორგი მამალაძის დაკავების ფაქტი მოგვიანებით  სახელმწიფო უსაფრთხოების სამსახურის ხელმძღვანელმა ანზორ ჩუბინიძემ დაადასტურა. სხვა უწყერბებს ამ ფაქტზე კომეტარი ჯერჯერობით არ გაუკეთებიათ.

სახელმწიფო უსაფრთხოების სამსახურის ხელმძღვანელი, რომელიც ამ დროისთვის ბერლინშია, ასევე ადასტურებს იმ ფაქტსაც, რომ პატრიარქის უსაფრთხოების სამსახურის უფროსი, იოსებ ოხანაშვილი ბერლინიდან საქართველოში შაბათს დაბრუნდა და პროკურატურაში დაკითხვაზე იმყოფებოდა. “სოსო ოხანაშვილმა ძალიან კარგი გააკეთა, რომ ჩავიდა და დაეხმარა გამოძიებას და ვფიქრობ, რომ ჩემმა ჩამოსვლამ ხელი შეუწყო ამ სამსახურის ფუნქციონირებას აქ. სოსო განაგრძობს ჩვეულებრივად [მუშაობას] და მასთან კითხვის ნიშნები ამ ეტაპზე არ არსებობს”,  – განაცხადა ჩუბინიძემ.

სახელმწიფო დაცვის სამსახურის უფროსი აცხადებს, რომ  ბერლინში პატრიარქის უსაფრთხოების შესამოწმებლად ჩავიდა.

საქართველოს კათოლიკოს-პატრიარქის ქორეპისკოპოსი, მეუფე იაკობი “რუსთავი 2”-ის შეკითხვას, თუ ვინ იცავს ახლა პატრიარქს და ადასტურებს თუ არა ის უწმინდესის შესაძლო მოწამვლის მცდელობის ფაქტს, პასუხობს, რომ ახლა „ჭორაობა“ არ სურს და ამ თემაზე თბილისში ჩამოსვლის შემდეგ ისაუბრებს.

საქართველოს კათოლიკოს-პატრიარქი გერმანიაში 2 თებერვალს გაემგზავრა. ამ დროისთვის კლინიკაში იმყოფებიან სასულიერო პირები და წმინდა სინოდის წევრები, რომლებიც  პატრიარქის ჯანმრთელობის პარაკლისს იხდიან.