სამხრეთ ოსეთში ევროკავშირის წარმომადგენლის განცხადების ირგვლივ ატეხილი სკანდალის დასასრული

სამხრეთი კავკასიისა და საქართველოს კრიზისების საკითხებში ევროკავშირის საგანგებო წარმომადგენელმა ჰერბერტ ზალბერმა საქართველოს საგარეო საქმეთა მინისტრის მოადგილესთან, დავით დონდუასთან ერთად განიხილა პრობლემა, რომელიც 16 მაისს, სამხრეთ ოსეთში მისი ვიზიტის დროს გაკეთებულმა გამონათქვამებმა გამოიწვია.

ზალბერი სამხრეთი ოსეთის ახალარჩეულ პრეზიდენტს შეხვდა, არჩევნებში გამარჯვება და „ძალიან მნიშვნელოვან თანამდებობაზე მუშაობის დაწყება“ მიულოცა. თბილისმა პროტესტი გამოხატა და ევროკავშირის წარმომადგენლის განცხადებას „მიუღებელი და გაუგებარი“ უწოდა.

საქართველოს საგარეო საქმეთა სამინისტროში შეხვედრა სამინისტროსგან ჰერბერტ ზალბერისადმი მიმართული საგანგებო მოთხოვნის შედეგად გაიმართა. შეხვედრის შედეგ ევროკავშირის საგანგებო წარმომადგენელმა ჟურნალისტებისადმი თავის განცხადებაში ხაზგასმით აღნიშნა, რომ ევროპის კავშირი სრულიად უჭერს მხარს საქართველოს ტერიტორიულ მთლიანობას.

“ეს ის პრინციპია, რომელიც ევროკავშირში დაეჭვებას არ ექვემდებარება, და მას, როგორც საგანგებო წარმომადგენელი, მეც ვიზიარებ. ამის შესახებ ყველგან და ყოველთვის ღიად და გახსნილად ვაცხადებ“, – თქვა ჰერბერტ ზალბერმა.

მან ასევე აღნიშნა, რომ ევროკავშირმა „მკაფიოდ განსაზღვრა, რომ ლეგალურად არ მიიჩნევს იმ ფორმატს, რომლითაც ახლახან თვითგამოცხადებულ სამხრეთ ოსეთში საპრეზიდენტო არჩევნები ჩატარდა, და ამგვარ მიდგომას მეც სრულად ვიზიარებ“.

სამხრეთი ოსეთის საგარეო საქმეთა სამინისტრომ ამ პოლიტიკურ სკანდალთან დაკავშირებით საპასუხო განცხადება გააკეთა:

“საქართველოში საერთაშორისო არენაზე მისდამი უსიტყვო მხარდაჭერას უკვე აშკარად ბოროტად იყენებენ, მათ შორის ჟენევის დისკუსიების საერთაშორისო შუამავლების მხრიდან, რომლებსაც, წესით, ქართულ-ოსური ურთიერთობების მოგვარების პროცესში ნეიტრალური და დისტანციური პოზიცია უნდა ეკავოთ. ბატონი ზალბერის მიერ გამოვლენილი დიპლომატიური თავაზიანობა საქართველოში ევროპის კავშირის მხრიდან ლამის თავიანთი ინტერესების ღალატად აღიქვეს“.

„უკვე დიდი ხანია, „ჟენევის დისკუსიების“ ქართველ მონაწილეთა ამგვარი განწყობა რეგიონში ძალის გამოუყენებლობისა და უსაფრთხოების მყარი სისტემის შემუშავების შესახებ დოკუმენტის მიღების მთავარ წინააღმდეგობას წარმოადგენს“, – ნათქვამია სამხრეთი ოსეთის საგარეო სქმეთა სამინისტროს განცხადებაში.

ტერმინოლოგია, რომელიც გამოყენებულია სტატიაში, ყოველთვის არ გამოხატავს რედაქციის პოზიციას