საბრძოლო მოქმედებების განახლების გამო პოროშენკომ გერმანიაში ვიზიტი შეწყვიტა

უკრაინის პრეზიდენტმა პეტრო პოროშენკომ, კონფლიქტის ზონაში სიტუაციის გამწყვავების გამო, გერმანიაში  სამუშაო ვიზიტი შეწყვიტა.

პრეზიდენტის ადმინისტრაციის ხელმძღვანელის მოადგილემ კონსტანტინ ელისეევმა განაცხადა, რომ პოროშენკომ კიევში დაბრუნება გადაწყვიტა, რათა კოორდინირება გაუწიოს მთავრობას დონეცკის მახლობლად მდებარე ქალაქ ავდეევკაში ჰუმანიტარული კატასტროფის აღსაკვეთად.  ქალაქი ბოლო დღეებში პრორუსი მებრძოლების მხრიდან არაერთხელ დაიბომბა.

სახელმწიფოს მეთაურმა მთავრობას საგანგებო სიტუაციათა სამსახურის შტაბების და  მოსახლეობისთვის გასათბობი პუნქტების მოწყობა, ასევე სოციალური ობიექტებისთვის ენერგიის ალტერნატიული წყაროებიდან მიწოდება  დაავალა. გარდა ამისა, პოროშენკოს ადმინისტრაციას დაევალა სამმხრივი საკონტაქტო ჯგუფის შეხვედრის მომზადება.

ანტიტერორისტული ოპერაციის შტაბის პრესცენტრის ინფორმაციით, გასულ ღამეს ბოევიკებმა ავდეევკის შემოგარენი “გრადის” რეაქტიული სისტემის დანადგარებიდან კვლავ დაბომბეს.  დაბომბვის შედეგად ქალაქი ელექტროენერგიისა და გათბობის გარეშე დარჩა.

30 იანვარს, დღის განმავლობაში პრორუსული შეიარაღებული ფორმირებები უკრაინულ პოზიციებს მძიმე არტილერიის გამოყენებით ბომბავდნენ, ფრონტის რამდენიმე მონაკვეთზე ისროდნენ ნაღმმტყორცნებიდან და ტანკებიდან. დაღუპულია სამი უკრაინელი სამხედრო, 20 დაჭრილია. ავდეევკაში დაიღუპა ერთი მშვიდობიანი მცხოვრები.

თავის მხრივ, თვითგამოცხადებულ დონეცკის სახალხო რესპუბლიკაში ვითარების გამწვავებაში უკრაინულ მხარეს ადანაშაულებენ. დონეცკის სახალხო რესპუბლიკაში აცხადებენ, რომ სროლების შედეგად დაღუპულია მაკეევკის მშვიდობიანი მოსახლე და ქალაქი იასინოვატაია მთლიანად ელექტროენერგიის გარეშეა დარჩენილი.

როგორც უკვე ცნობილია, 29 იანვარს პრორუსული შეიარაღებული ფორმირებები ავდეევკის ე.წ. “პრომზონაზე”  იერიშის მიტანას ცდილობდნენ. ორივე მხარეს არის დანაკარგები.

უკრაინის საგარეო საქმეთა მინისტრმა პაველ კლიმკინმა აღნიშნა, რომ პოროშენკომ უკრაინელ დიპლომატებს დაავალა, ავდეევკაში შექმნილი საგანგებო სიტუაციის შესახებ გაეროს უშიშროების საბჭო და ეუთო საქმის კურსში ჩაეყენებინათ.  უკრაინის საგარეო საქმეთა სამინისტრომ დონბასში სიტუაციის გამწვავებაში რუსეთი დაადანაშაულა და მოსკოვს  საბრძოლო მოქმედებების შეწყვეტა და ცეცხლის შეწყვეტის რეჟიმის განუხრელად დაცვა მოსთხოვა.

გაეროს მონაცემებით, უკრაინის აღმოსავლეთში საბრძოლო მოქმედებების შედეგად 2014 წლის გაზაფხულიდან 2016 წლის სექტემბრამდე დაახლოებით 9,5 ათასი ადამიანი დაიღუპა. მოცემულ მომენტში კონფლიქტის ზონაში მოქმედებს ზავი, მინსკის შეთანხმებების შესაბამისად, რაც მხარეებს დაპირისპირების ხაზზე მძიმე შეიარაღების არსებობას უზღუდავს. რუსეთი კონფლიქტში თავის მონაწილეობას ამ დრომდე უარყოფს.