ბოსნიის ომის სერბ გენერალს სამუდამო პატიმრობა მიუსაჯეს

ფოტო: Reuters

რატკო მლადიჩი – ყოფილი სერბი გენერალია, რომელიც 1992-1995 წლებში, იუგოსლავიის ომის დროს ბოსნიელი სერბების ჯარს მეთაურობდა.

ის თერთმეტი მუხლის მიხედვით ცნეს დამნაშავედ. ყოფილი იუგოსლავიის საქმეთა საერთაშორისო ტრიბუნალმა მლადიჩი ამ მუხლებიდან ათში დამნაშავედ ცნო, – იუწყება  BBC.

რატკო მლადიჩმა ყველაზე მასშტაბური დანაშაული 1995 წელს ჩაიდინა, როდესაც სერებრენიცაში 7 ათასი მუსლიმის დახოცვის ბრძანება გასცა.

მლადიჩი ხელმძღვანელობდა სარაევოს ალყასაც, რომელიც დაახლოებით სამნახევარ წელიწადს გაგრძელდა. ამ დროის განმავლობაში ქალაქში დაახლოებით ათი ათასამდე ადამიანი დაიღუპა.

ომის დასრულებისთანავე მლადიჩი სერბეთში მიიმალა. 2011 წლამდე მისი ადგილსამყოფელი უცნობი იყო.  2011 წელს ის სერბეთის სპეცსამსახურების მიერ ჩატარებული ოპერაციის შედეგად დააკავეს. მლადიჩის დაკავება და საერთაშორისო ტრიბუნალისთვის გადაცემა ერთ-ერთი პირობა იყო, რომელიც სერბეთს ევროკავშირში გასაწევრიანებლად წაუყენეს.

მლადიჩი საკუთარ დანაშაულს არ აღიარებს. მან არაერთხელ გაიმეორა, რომ სამოქალაქო ომში „უბრალოდ თავის ხალხს იცავდა“.

განაჩენის გამოტანის მომენტში მლადიჩი სასამართლოს დარბაზში არ იმყოფებოდა.  ყოფილი სერბი გენერალი სასამართლოს დარბაზიდან მოსამართლის მიმართ არაკორექტული წამოძახილების გამო გააძევეს.