ჟურნალისტი ელისო კილაძე შვილის დაკავებას მის მიერ დაწერილ სტატიას უკავშირებს

გაზეთ ქრონიკა პლიუსის რედაქტორი ელისო კილაძე შვილის დაკავების დეტალებზე საუბრობს. მისი მტკიცებით, დაკავების პროცესში სამართალდამცველების მხრიდან ადგილი ჰქონდა სიტყვიერ და ფიზიკურ შეურაცხყოფას და ნივთმტკიცებულებების გაყალბებას.

გაზეთ ქრონიკა პლიუსის რედაქტორი შვილი სამართალდამცველებმა გუშინ ღამე დააკავეს. შსს ინფორმაციით მისი პირადი ჩხრეკის დროს ამოღებულია 2 შეკვრა ფხვნილი და ამბები.28 წლის დავით ხარშილაძეს 260-ე მუხლის პირველი ნაწილით გათვალისწინებული ბრალი უკვე წარედგინა, რაც ნარკოტიკული საშუალების უკანონოდ შეძენა – შენახვას გულისხმობს.

ელისო კილაძის თქმით, მომხდარში სახელმწიფო უსაფრთხოების სამსახურის ხელმძღვანელის მოადგილე იოსებ გოგაშვილი უშუალოდ მონაწილეობდა.

“ორი კვირის უკან პოლიციის მთავარ სამმართველოზე ძალიან მწვავე მასალა გამოვაქვეყნე. ასევე, იცით თქვენ ჩემი დაპირისპირება სუს-ის უფროსის მოადგილესთან, იოსებ გოგაშვილთან. თუ გარიგება ეხება იმას, რომ მე ჩემი ჟურნალისტური საქმიანობა შევწყვიტო ან რაიმე ტიპის ზემოქმედება ჩემზე მოახდინონ, ჩემი პასუხი იქნება – არა,” – აცხადებს ელისო კილაძე.

კილაძის განცხადებით, ოჯახმა დაკავების შესახებ მხოლოდ 4 საათის შემდეგ შეიტყო. მისივე ინფორმაციით, ჩატარდა ნარკოლოგიური შემოწმება, რის შედეგადაც აღმოჩნდა, რომ დაკავებული ნარკოტიკული ნივთიერების ზემოქმედების ქვეშ არ იმყოფებოდა. ჟურნალისტი ამბობს,რომ მისი შვილი ცე ჰეპატიტზე მკურნალობის კურსს გადის და ნარკოტიკების მოხმარების ფაქტი არარეალურია.

ადვოკატის თქმით დაკავებული დავით ხარშილაძე ამბობს, რომ მისი დაკავება მოხდა ძალის გამოყენებით. დაკავებულთან იმყოფებოდა სახალხო დამცველის წარმომადგენელიც. ლევან ბეგიაშვილის ამბობს,რომ ბრალდებულს აქვს შუბლზე მცირე დაზიანება,რომელიც დაკავების დროს მიიღო.