პროკურატურა „მაღალი რანგის სასულიერო პირის“ მოწამლვის მცდელობის ფაქტს იძიებს

საქართველოს მთავარი პროკურორის განცხადებით, მაღალი რანგის სასულიერო პირის შესაძლო მოწამლვის ფაქტზე საპატრიარქოს ქონების განკარგვის სამსახურის ხელმძღვანელი მამა გიორგი მამალაძეა დაკავებული.

როგორც საგანგებო პრესკონფერენციაზე ირაკლი შოთაძემ განაცხადა, მამა გიორგი მამალაძე აეროპორტში დააკავეს, როდესაც ბერლინში მიემგზავრებოდა. ჩხრეკის შედეგად მას მომწამლავი ნივთიერება ციანიდი აღმოაჩნდა,  ასევე დეკანოზის სახლის ჩხრეკის შედეგად პროკურატურამ ცეცხლსასროლი იარაღი და 6 ცალი საბრძოლო ვაზნა ამოიღო.

მთავარი პროკურატურის განცხადებით, უწყებას მოქალაქემ მიმართა, რომლის განცხადებით, დეკანოზმა მას შხამიანი ნივთიერება ციანიდის მოპოვება სთხოვა,სანაცვლოდ კი ფულს დაჰპირდა.

საპატრიარქოს ქონების განკარგვის სამსახურის ხელმძღვანელი მამა გიორგი მამალაძე 10 თებერვალს თბილისის საერთაშორისო აეროპორტში დააკავეს. მას ბრალი 108-ე მუხლით ედება, რაც მკვლელობის მომზადებას გულისხმობს და სასჯელის სახით 7 დან-15 წლამდე თავისუფლების აღკვეთას ითვალისწინებს.

პროკურატურაში აცხადებენ, რომ გიორგი მამალაძე ამ დროისთვის ბრალს არ აღიარებს.

შეგახსენებთ, 12 თებერვალს საღამოს ტელეკომპანია „რუსთავი 2“-მა გაავრცელა ცნობა იმის შესახებ, რომ მამა გიორგი მამალაძის დაკავება სრულიად საქართველოს კათოლიკოს-პატრიარქის ილია მეორის მოწამლვის მცდელობას უკავშირდება.

ილია მეორე ამჟმად ბერლინში იმყოფება, სადაც მას დღეს Helios Berlin bux-ის კლინიკაში ნაღვლის ბუშტზე, ლაპარასკოპიური მეთოდით ოპერაციაჩაუტარდა. როგორც ექიმებმა განაცხადეს, ამ დროისთვის პატრიარქი ინტენსიურ განყოფილებაშია გადაყვანილი და ოპერაციამ წარმატებით ჩაიარა.

საქართველოს მართლმადიდებელი ეკლესიის პატრიარქი ილია მეორე 2 თებერვალს სამკურნალოდ გერმანიაში გაემგზავრა. მისი ექიმის, ცისანა შარტავას ცნობით, კენჭოვანი დაავადების ერთი ფაზა დასრულდა, თუმცა ლაბორატორიულმა გამოკვლევამ გამწვავება აჩვენა, ამიტომ პატრიარქის გერმანიაში გამგზავრება გადაწყდა შემდეგი გამოკვლევებისა და მკურნალობის მიზნით. ექიმებს 10 დღე დასჭირდათ იმისათვის, რომ გადაწყვეტილება მიეღოთ ქირურგიული ჩარევის შესახებ.