ევროკავშირის წარმომადგენელმა სამხრეთ ოსეთის ახლადარჩეულ პრეზიდენტის მიულოცა. თბილისი ბრიუსელიდან განმარტებებს ელის

საქართველოს კულტურის მინისტრის მიხეილ გიორგაძე მიიჩნევს, რომ ევროკავშირის სპეციალური წარმომადგენელი სამხრეთ კავკასიისა და საქართველოს კრიზისების საკითხებში ჰერბერტ ზალბერი “სხვა პირით უნდა ჩანაცვლდეს”.  მიზეზი, კავკასიის საკითხებში  ევროკავშირის სპეციალური წარმომადგენლის ჰერბერტ ზალბერის განცხადებაა, რომელიც მან სამხრეთ ოსეთში 16 მაისს ვიზიტის დროს გააკეთა.

ზალბერმა სამხრეთ ოსეთის ახლადარჩეულ პრეზიდენტს ანატოლი ბიბილოვს საპრეზიდენტო არჩევნებში გამარჯვება მიულოცა.

„პირველ რიგში, მინდა მოგილოცოთ არჩვენების შედეგები და მინდა მოგილოცოთ ამ ძალიან მნიშვნელოვან თანამდებობაზე მუშაობის დაწყება“, – მიმართა ზალბერმა ბიბილოვს.

მიხეილ გიორგაძის თქმით, ქართული მხარისთვის სრულიად მიუღებელია ეს ვითარება, ქართულ მხარეს კომუნიკაცია აქვს ევროკავშირთან და ამ პროცესში ლოგიკური გაგრძელება სხვა კანდიდატით ჩანაცვლება იქნება.

ამ საკითხთან დაკავშირებით 17 მაისსევროკავშირის წარმომადგენელი საქართველოში  იანოშ ჰერმანი საქართველოს საგარეო საქმეთა სამინისტროში საგანგებო შეხვედრაზე დაიბარეს. ჰერმანთან საგანგებო შეხვედრის შემდეგ საგარეო საქმეთა მინისტრის მოადგილე დავით დონდუამ განმარტა, რომ ევროკავშირის მხრიდან არაერთხელ გაკეთებულა საქართველოს მხარდამჭერი განცხადებები, თუმცა ამჯერად ოფიციალური ბრიუსელისგან განმარტებებს ელიან.

“ის, რაც ჩვენ დღეს მოვისმინეთ ევროკავშირის სპეციალური წარმომადგენლის და ჟენევის თანათავმჯდომარის მხრიდან, რბილად რომ ვთქვათ მიუღებელი და გაუგებარია. ის ეწინააღმდეგება საერთაშორისო სამართლის პრინციპებს და ხელს არ უწყობს როგორც საქართველოს, ასევე საერთაშორისო თანამეგობრობის ძალისხმევას კონფლიქტის მშვიდობიანი მოწესრიგებისთვის. ჩვენ კავშირზე ვართ ევროკავშირის ხელმძღვანელობასთან და იმედი გვაქვს, რომ ამას სათანადო რეაქცია მოჰყვება ბრიუსელის მხრიდან“, – განაცხადა დონდუამ.

იანოშ ჰერმანმა კი აღნიშნა, რომ ევროკავშირი არ აღიარებს სამხრეთ ოსეთში ჩატარებულ ე.წ. არჩევნებს.

„რასაც ჩვენ ვაღიარებთ და მხარს ვუჭერთ არის საქართველოს ტერიტორიული მთლიანობა და სუვერენიტეტი. ბატონ მინისტრის მოადგილესთან ჩვენ ვისაუბრეთ თანამშრომლობაზე ამ სფეროში“, – განაცხადა იანოშ ჰერმანმა.

კითხვაზე, თუ რატომ ჩავიდა ევროკავშირის სპეციალური წარმომადგენელი ჰერბერტ ზალბერი სამხრეთ ოსეთში, ჰერმანმა განაცხადა, რომ ის გამოხატავს ევროკავშირის პოზიციას, კონკრეტულად ვიზიტთან დაკავშირებით კი „ბატონი ზალბერი თავად გააკეთებს განმარტებას“.

ზალბერის ცხინვალში ვიზიტის მიზანი ჟენევის დისკუსიის მორიგი, მე-40 რაუნდის მზადებასთან არის დაკავშირებული. ის 17 მაისს გალსაც სტუმრობდა. ჟენევის დისკუსიის თანათავმჯდომარეები გალში, ოკუპაციის ხაზზე 3 საკონტროლო-გამშვები პუნქტის დახურვის პროცესს დაესწრნენ. მათ ადგილზე გალის ადმინისტრაციის ხელმძღვანელი, თემურ ნადარაია და აფხაზეთის საგარეო საქმეთა მინისტრი, დაურ კოვე, შეხვდნენ.    

• ანატოლი ბიბილოვმა 9 აპრილს სამხრეთ ოსეთში გამართულ საპრეზიდენტო არჩევნებში გაიმარჯვა და პრეზიდენტის პოსტზე ლეონიდ თიბილოვი შეცვალა.
• ჟენევის საერთაშორისო მოლაპარაკებების ფორმატი შეიქმნა საქართველოსა და რუსეთს შორის 2008 წლის 12 აგვისტოს ცეცხლის შეწყვეტის შეთანხმების შესაბამისად და მისი პირველი რაუნდი გაიმართა 2008 წლის 15 ოქტომბერს. დღევანდელი მდგომარეობით, შედგა ჟენევის საერთაშორისო მოლაპარაკებების 39 რაუნდი, მორიგი მე-40 რაუნდი დაგეგმილია 20-21 ივნისს. მოლაპარაკებებს თანა-თავმჯდომარეობენ ევროკავშირის, გაერო-სა და ეუთო-ს წარმომადგენლები და  თბილისის, სოხუმისა და ცხინვალის მონაწილეებთან ერთად, ასევე ესწრებიან დელეგაციები რუსეთიდან და აშშ-დან.  საქართველოს მთავრობა განიხილავს ჟენევის საერთაშორისო მოლაპარაკებებს როგორც ერთადერთ ფორმატს ცეცხლის შეწყვეტის შეთანხმების შესრულების უზრუნველსაყოფად.

სტატიაში გამოყენებული ტერმინოლოგია არ გამოხატავს რედაქციის პოზიციას