პრეზიდენტების - ტრამპისა და პუტინის იდუმალებით მოცული შეხვედრა

ჰამბურგში ახლახან გამართულ G-20-ის სამიტზე შედგა პრეზიდენტების პუტინისა და ტრამპის მეორე შეხვედრა – იმის გარდა, რომელიც მანამდე იყო ცნობილი.

სამიტის მონაწილეების პატივსაცემად გამართულ საზეიმო ვახშამზე ამერიკის პრეზიდენტი მოულოდნელად თავისი ადგილიდან ადგა და იმ მაგიდასთან გადაჯდა, რომელთანაც ვლადიმირ პუტინი იჯდა. მათ შორის საუბარი დაახლოებით ერთ საათს გაგრძელდა.

დამკვირვებლები აღნიშნავენ, რომ ასეთი იმპროვიზირებული მოლაპარაკებები სამიტებზე ხშირი მოვლენაა, მაგრამ ეს შემთხვევა ფრიად უცნაურად გამოიყურებოდა. საუბარში არ მონაწილეობდა ამერიკელი თარჯიმანი; ანუ სტენოგრამა – რომლის შედგენაც თარჯიმნის მოვალეობებში შედის – მხოლოდ რუსული მხარის განკარგულებაში იქნება.

თეთრმა სახლმა ტრამპსა და პუტინს შორის მეორე შეხვედრის ფაქტი აღიარა, თუმცა მას „მოკლე“ უწოდა და ის, „მსოფლიოს ლიდერებთან კონტაქტების დამყარების მიზნით, პრეზიდენტის მიერ მისი ჩვეულებრივი მოვალეობის შესრულებად დაახასიათა“.

თუმცა, განსხვავებული აზრი აქვს ამერიკული მედიის დიდ ნაწილს, რომლებმაც ეს ამბავი ტოპ სიახლეებს შორის გამოაქვეყნეს. ტრამპის თანამშრომლებისა და ნათესავების მისამართით რუსეთთან უკანონო კავშირების შესახებ არსებული ბრალდებები სულ უფრო მატულობს და კონკრეტულ ხასიათს იძენს. ამ კავშირების თაობაზე ძიებას ახლა წარმომადგენელთა პალატა და ამერიკის კონგრესის სენატი აწარმოებს, ასევე იუსტიციის სამინისტროს საგანგებო პროკურორი.