მუსტაფა ემრე ჩაბუქი გირაოთი გაათავისუფლეს

თბილისის საქალაქო სასამართლომ 1000 ლარიანი გირაოს სანაცვლოდ გაათავისუფლა დემირელის სახელობის კოლეჯის მენეჯერი, მუსტაფა ემრე ჩაბუქი. მას საექსტრადიციო პატიმრობის ვადა 23 თებერვალს ეწურებოდა. მოსამართლეს აღკვეთის ზომის – პატიმრობის გირაოთი შეცვლის შუამდგომლობით ბრალდების მხარემ მიმართა. პროკურატურა ჩაბუქისთვის 10 000-ლარიან გირაოს ითხოვდა.

მოსამართლე არსენ კალატოზიშვილის ამ გადაწყვეტილებას ჩაბუქის ახლობლები და თანამშრომლები, რომლებიც სხდომათა დარბაზის გარეთ იმყოფებოდნენ, ტაშით შეხვდნენ.

დემირელის სახელობის კერძო კოლეჯის მენეჯერი მუსტაფა ემრე ჩაბუქი 2017 წლის 24 მაისს დააკავეს. მიზეზი თურქული მხარის მოთხოვნა იყო. თურქული მხარე აცხადებდა, რომ ჩაბუქი ფეთჰულა გიულენის ტერორისტული ორგანიზაციის საქმიანობას უწყობდა ხელს.

დემირელის კოლეჯი, ისევე როგორც ჩაღლარის განათლების ქსელის რამდენიმე საგანმანათლებლო დაწესებულება საქართველოში, ფეთჰულა გიულენის სახელთანაა დაკავშირებული, რომელსაც 2016 წლის 15 ივლისს თურქეთში მომხდარი სამხედრო გადატრიალება ბრალდება. თურქეთის მთავრობამ გიულენის მიერ თურქეთში გახსნილ შაჰინის სკოლებზე პირდაპირი იერიში მიიტანა და განაცხადა, რომ იქ “ტერორისტებს ზრდიან”.

თურქული მხარისთვის ჩაბუქის გადაცემის დაუშვებლობაზე ბევრი გავლენიანი საერთაშორისო ორგანიზაცია საუბრობდა. ჩაბუქის დაკავებიდან რამდენიმე დღეში Amnesty International-მა საქართველოს ხელისუფლებას მოუწოდა არ გადასცეს მუსტაფა ემრე ჩაბუქი თურქეთს, რადგან ის თურქეთში შესაძლოა წამების, სასტიკი არაადამიანური და ღირსების შემლახავი მოპყრობის მსხვერპლი გამხდარიყო. Amnesty International-ის განცხადებაში აღნიშნულია, რომ  2016 წლის შემდეგ, თურქეთის მთავრობა ზეწოლას ახორციელებს მოკავშირეებზე, რათა მათ ფეთჰულა გიულენის სავარაუდო მხარდამჭერები დააკავონ.