მოსკოვში გამარჯვების დღე ტრადიციულად აღლუმით აღნიშნეს

ნაცისტურ გერმანიაზე გამარჯვების  დღის აღსანიშნავი ტრადიციული  აღლუმი მოსკოვში, წითელ მოედანზე გაიმართა. მასში 10 ათასი ადამიანი და 114 ერთეული სახმელეთო ტექნიკა მონაწილეობდა. უამინდობის გამო, ამჯერად წითელი მოედნის თავზე   სამხედრო ავიაცია არ დაფრინავდა.

სიტყვით გამოვიდა რუსეთის პრეზიდენტი ვლადიმერ პუტინი, რომელმაც განაცხადა, რომ შეიარაღებული ძალები – რუსული სუვერენიტეტის მთავარი გარანტია.

„მაგრამ ტერორიზმთან, ექსტრემიზმთან, ნეონაციზმთან, და სხვა საფრთხეებთან ეფექტური ბრძოლისთვის აუცილებელია საერთაშორისო საზოგადოებრიობის ძალების კონსოლიდაცია. ჩვენ ამგვარი თანამშრომლობისთვის გახსნილები ვართ“, – თქვა პუტინმა.

უნდა აღინიშნოს, რომ პირველად მოხდა, როდესაც რუსეთის სახელმწიფოს მეთაურმა თავის სიტყვაში არ  მოიხსენია სსრკ-ს მოკავშირეები ანტიჰიტლერული კოალიციიდან.  

დღესასწაულის წინ  აქტიურად  განიხილებოდა საზოგადოებრივი აქცია „უკვდავი პოლკი“, რომლის დროსაც ადამიანები ქუჩებში თავიანთი დაღუპული ნათესავების პორტრეტებით გამოდიან. წელს ცნობილი გახდა, რომ ადამიანებს ამ აქციაში მონაწილეობას ადმინისტრაციული წესით აიძულებენ, რის გამოც, მის მიმართ ინტერესი საგრძნობლად შემცირდა.

ბელარუსში ( ამ ქვეყნის 1.3 მილიონი მოქალაქე ომობდა, 400 ათასი – პარტიზანულ მოძრაობაში მონაწილეობდა) სამხედრო აღლუმი არ ტარდება. მინსკსა და ქვეყნის სხვა ქალაქებში დაღუპულთა ქანდაკებებთან ყვავილები დააწყვეს, საღამოს კი ფეიერვერკიც მოეწყობა.   

შეგახსენებთ, რომ მსოფლიოს უმეტეს ქვეყანაში ნაცისტურ გერმანიაზე გამარჯვება 8 მაისს აღინიშნება.