მორიგი "ღირსების მკვლელობა" ინგუშეთში პოლიციის მიზეზით მოხდა

კავკაზსკი უზელის მასალების მიხედვით 

ინგუშეთში – ჩრდილოკავკასიურ რესპუბლიკაში რუსეთის შემადგენლობაში, მორიგი “ღირსების მკვლელობა” მოხდა. ახალგაზრდა ქალი საკუთარმა ძმამ მოკლა. ტრაგედია ოპერატიული ინფორმაციის გაჟონვამ გამოიწვია – პოლიციის მიერ გადაღებული ვიდეო სოციალურ ქსელებში მოხვდა. უფლებადამცველების თქმით, მსგავსი მკვლელობები ჩრდილოეთ კავკასიაში ჩვეულებრივი მოვლენაა.

საბედისწერო ვიდეო 

ტრაგედია მას შემდეგ მოხდა, რაც 7 თებერვალს ინგუშეთის პოლიციამ რესპუბლიკის მკვიდრის, ისა ალტემიროვის დაკავება სცადა. იგი ეჭვმიტანილი იყო გამომძალველობაში – გამოძიებას მიაჩნდა, რომ ალტემიროვი და მისი თანამზრახველები ქალებს ინტიმური ურთიერთობისკენ უბიძგებდნენ, მათი მონაწილეობით ეროტიულ ვიდეოებს იღებდნენ, შემდეგ კი გამოაშკარავების მუქარით გამოსასყიდს ითხოვდნენ. ადგილობრივი მედია აღნიშნავს, რომ საუბარი გათხოვილ ქალებზეა.

ალტემიროვი გაქცევის მცდელობისას დაიღუპა – იგი მეხუთე სართულიდან გადახტა. შტურმი სამართალდამცველებმა ვიდეოზე გადაიღეს. ბინაში ორი ქალი იმყოფებოდა – 23 და 33 წლის, ერთი მათგანი კადრში მოხვდა. მეორე დღეს, 8 თებერვალს, ვიდეო Instagram- ში აიტვირთა და სწრაფად გავრცელდა. ქალის იდენტიფიცირება კადრში თავისუფლად იყო შესაძლებელი,  იგი სახელს და დაბადების ადგილსაც ასახელებდა.

ქალი იმავე დღეს საკუთარმა ძმამ მოკლა. მკვლელი პოლიციას ჩაბარდა.

”კავკაზკი უზელს” მოჰყავს იურისტების მოსაზრება იმის თაობაზე, რომ ინგუში სამართალდამცველების ქმედება შეიძლება დაუდევრობად, ასევე პერსონალური მონაცემების შესახებ კანონის დარღვევად შეფასდეს.

ინგუშეთის ზოგიერთი მაცხოვრებელი სოციალურ ქსელში თანაგრძნობას მკვლელის, და არა მსხვერპლის მიმართ გამოხატავს:

”რა თქმა უნდა, ძმა ნამდვილი ვაჟკაცივით მოიქცა, მაგრამ თქვენ არ გიფიქრიათ, რომ მან ამით მთელი ცხოვრება უნდა იცხოვროს, ალაჰმა ყველას აშოროს ასეთი რამ”.

“ამ სიტუაციაში ყველაზე უარესი არის არა ის, რომ ეს ნაძირლები გათხოვილ ქალებს აცდუნებდნენ … ყველაზე უარესი ისაა, რომ ეს გათხოვილი ქალები ამის საშუალებას აძლევდნენ. რამდენად უნდა იყოს ქალი ზნედაცემული, რომ ასეთი რამე გააკეთოს. მათ ხომ ტალახში ამოსვარეს საკუთარი ქმრები, ძმები, მამები და მთელი თავისი გვარი”.

“ღირსების მკვლელობები” ჩრდილო კავკასიაში “

ქალების მკვლელობა “ღირსების” მოტივით, ანუ, როგორც მათ უწოდებენ, „ღირსების მკვლელობები“  ქალთა მიმართ ძალადობის ერთ-ერთ ყველაზე სასტიკ ფორმას წარმოადგენს.

რუსული პროექტის “სამართლებრივი ინიციატივის” ინფორმაციით, 5 წლის განმავლობაში, 2012 წლიდან 2017 წლამდე, რუსეთის ჩრდილოეთ კავკასიის რესპუბლიკებში 36 ქალი მოკლეს. სასამართლომ მხოლოდ 14 საქმე მივიდა, ერთი ადამიანი გაამართლეს. უფლებადამცველები მიიჩნევენ, რომ ქალთა მკვლელობის რეალური სტატისტიკა გაცილებით უარესია – არსებობს მონაცემები, რომ მსხვერპლთა ნათესავები ამგვარ ფაქტებს მალავენ,  საზოგადოების დიდი ნაწილი კი ასეთ მკვლელობებს გაგებით ეკიდება და მსხვერპლს ადანაშაულებს.

• 90 წამი: ”ღირსების მკვლელობები” ჩრდილო კავკასიაში – 36 ქალი ხუთ წელიწადში

მკვლელობები ოჯახის „ღირსების“ აღდგენის მიზნით კვლავაც დაუსჯელია მსოფლიოს ბევრ რეგიონში. იმ ქვეყნებს შორის, სადაც ეს პრაქტიკა ყველაზე ფართოდ არის გავრცელებული, საერთაშორისო ორგანიზაციები  ირანს, პაკისტანს და პალესტინას გამოყოფენ.

რუსეთში ქალთა მიმართ მსგავსი დანაშაულების შემსწავლელი პირველი კვლევის ავტორებს მიაჩნიათ, რომ მიზეზები, რომლის გამო ქვეყანაში ”ღირსების მკვლელობები” ფართო საზოგადოებისთვის ცნობილი არ ხდება და მათ არც საერთაშორისო გამოხმაურება მოჰყვება, არის ინფორმაციის ნაკლებობა და თემის ტაბუირება  ადგილობრივი თემების მიერ.