მმართველმა პარტიამ საქართველოს პრემიერ-მინისტრობის კანდიდატი დაასახელა

პარტია “ქართულმა ოცნებამ” დღევანდელი მსჯელობის შემდეგ საქართველოს პრემიერ-მინისტრობის კანდიდატად მამუკა ბახტაძე დაასახელა.

პარტიაში წარდგენისას ბახტაძემ განაცხადა, რომ მისი ხედვა დამყარებული იქნება სამ ძირითად პრინციპზე:

„პირველი – ეს არის ქართველი ხალხის ისტორიული არჩევანის ბოლომდე მიყვანა და საქართველოს ევროატლანტიკურ სივრცეში სრულფასოვანი ინტეგრაცია. ამ კუთხით „ქართულ ოცნებას“ აქვს დიდი წარმატებები და ამ წარმატებებს სჭირდება გაღრმავება და განმტკიცება. მეორე – ჩვენ განვახორციელებთ ინოვაციურ და ფუნდამენტურ რეფორმებს ყველა მიმართულებით. ამ რეფორმების შედეგად ჩვენ ჩამოვაყალიბებთ ახალ ეკონომიკურ მოდელს, ახალი სამართლიანი თამაშის წესებით, რომელიც შეეხება ყველა ოჯახს და ჩვენს ყველა მოქალაქეს. ჩვენ შევძლებთ და შევამცირებთ ჩამორჩენას დემოკრატიის მაღალ სტანდარტსა და ეკონომიკურ მდგომარეობას შორის. მესამე პრინციპი ეს არის მცირე მთავრობის კონცეფცია. საქართველოს სჭირდება მცირე და ამავე დროს მოქნილი და ეფექტური სამთავრობო უწყებები. ამასთან ერთად, მიზანშეწონილად მიმაჩნია გაძლიერდეს ინსტიტუციური და საზოგადოებრივი კონტროლი ამ უწყებებზე ანტიკორუფციული ხაზით“.

“ქართულმა ოცნებამ” ახალი პრემიერის შერჩევა მას შემდეგ დაიწყო, რაც 13 ივნისს თანამდებობა გიორგი კვირიკაშვილმა დატოვა პარტიის თავმჯდომარე ბიძინა ივანიშვილთან ფუნდამენტურ საკითხებზე შეუთანხმებლობის გამო. ბახტაძე მის კაბინეტში 2017 წლიდან ფინანსთა მინისტრის პოზიციას იკავებდა, მანამდე კი –  „საქართველოს რკინიგზის“ გენერალური დირექტორი იყო.

ბახტაძე იყო პირველი, რომელმაც ფინანსთა მინისტრის სავარძლიდან საქართველოში ბანკების საქმიანობა გააკრიტიკა. ის ბანკებისთვის დამატებითი რეგულაციების შემოღებაზე საუბრობდა.

ვინ არის მამუკა ბახტაძე?

პრემიერობის კანდიდატის შესახებ საქართველოს მოსახლეობის ნახევარმა არაფერი იცის. NDI-ს ბოლო კვლევების მიხედვით, გამოკითხულთა 43 პროცენტი აცხადებდა, რომ არ იცის ვინ არის მამუკა ბახტაძე. IRI-ის კვლევის მიხედვით კი გამოკითხულთა 55 პროცენტს არ სმენია მისი სახელი.

პრემიერობის კანდიდატი ტექნიკურ მეცნიერებათა დოქტორია. დაამთავრა თბილისის სახელმწიფო უნივერსიტეტი და საქართველოს ტექნიკური უნივერსიტეტი. არის ლომონოსოვის სახელობის მოსკოვის სახელმწიფო უნივერსიტეტის მაგისტრის ხარისხის მფლობელი. 2010 წელს კი MBA-ის კვალიფიკაცია INSEAD-ის ბიზნესსკოლაში მიიღო.

ქართულ მედიაში გავრცელებული ინფორმაციის მიხედვით, 2012 წლის საპარლამენტო არჩევნების დროს მამუკა ბახტაძემ, როდესაც ის საერთაშორისო ენერგეტიკულ კორპორაციაში გენერალური დირექტორის თანამდებობას იკავებდა, “ერთიან ნაციონალურ მოძრაობას” 20 ათასი ლარი შესწირა.

ასევე ქართულ მედიაში ვრცელდებოდა ინფორმაცია, რომ მამუკა ბახტაძე ბიძინა ივანიშვილის შვილის, უტა ივანიშვილის მეგობარია. თუმცა, ბახტაძემ განაცხადა, რომ ის არ იცნობს ივანიშვილის არცერთ შვილს.