საქართველოში კორონავირუსით ინფიცირების უკვე 12 შემთხვევა დადასტურდა

საქართველოში კორონავირუსით ინფიცირების 12 შემთხვევა დადასტურდა. ამის შესახებ ინფორმაცია მთავრობის მიერ შექმნილ სპეციალურ ვებ-გევრდზე stopcov.ge-ზე გამოქვეყნდა.

ამასთან, ვებ-გვერდზე გამოქვეყნებული ინფორმაციიდან ირკვევა, რომ კარანტინის რეჟიმში 140 ადამიანია, ხოლო სტაციონარში მეთვალყურეობას 42 ადამიანი გადის.

•  2-წუთიანი ვიდეო იმის შესახებ, თუ როგორ უნდა დავიცვათ თავი კორონავირუსისგან

• საქართველო: დამსაქმებლებს მოვუწოდებთ არ დაუშვან სამსახურში მაღალი რისკის ქვეყნებიდან ჩამოსულები

• ყველაფერი კორონავირუსის შესახებ

ერთ-ერთი ინფიცირებულია ნიკოლოზ გამყრელიძე – დაავადებათა კონტროლის ეროვნული ცენტრის დირექტორის ამირან გამყრელიძის შვილი.

ნიკოლოზ გამყრელიძემ თავის ფეისბუკზე დაწერა, რომ ჰქონდა კონტაქტი იტალიიდან დაბრუნებულ ინფიცირებულ თანამშრომელთან.

“გუშინ დამეწყო ამ ვირუსის დამახასიათებელი სიმპტომატიკა, ჩავითვალე მომატებულ რისკის მქონე პაციენტად და გამიკეთდა ანალიზი რომელმაც დაადასტურა რომ ვარ დაინფიცირებული კორონავირუსით”, – წერს გამყრელიძე.

ეს პირველი შემთხვევაა ვირუსის საქართველოში გავრცელების.

აქამდე ყველა შემთხვევაში ვირუსი უშუალოდ იტალიიდან ან ირანიდან ჩამოსულ ადამიანებს გამოუვლინდათ.

დაავადებათა კონტროლის ცენტრის თავმჯდომარემ ამირან გამყრელიძემ თქვა, რომ ვირუსმა არ იცის “ვინ ვისი შვილია”.

ამირან გამყრელიძის შვილი, ნიკოლოზ გამყრელიძე თავადაც მედიკოსია. იგი ერთ-ერთი მსხვილი კლინიკის, “ევექსის” დირექტორია.

როგორც ირკვევა, ადამიანი, რომლისგანაც ის დაინფიცირდა, მისი თანამშრომელი, ასევე სამედიცინო დაწესებულების მუშაკი, ერთ-ერთი მაღალი თანამდებობის პირია.

ეს ადამიანი კვირას ღამე ჩამოვიდა საქარველოში იტალიიდან, იქ გატარებული რამდენიმედღიანი შვებულების შემდეგ და მეორე დღესვე ანუ ორშაბათს მივიდა სამსახურში, სადაც ჩაატარა თათბირი. სწორედ ამ თათბირს ესწრებოდა ნიკოლოზ გამყრელიძეც.

მეორე დღესვე ამ ადამიანის მდგომარეობა დამძიმდა და მას დაუდგინდა კორონავირუსი.

როგორც ამირან გამყრელიძე ამბობს, მას შემდეგ მისი შვილი თვითიზოლაციაში იმყოფებოდა:

“ჩემი შვილი ბოლო ორი დღე რა თქმა უნდა, როცა პირველი სიმპტომი გაუჩნდა, ის განათლებით ექიმია და თვითიზორილებული იყო. პირველი ტესტი იყო საეჭვო, ძალიან მსუბუქი, ამიტომ ჩავთვალეთ მიზანშეწონილად რამდენიმეჯერ მისი კვლევა და გუშინ დადასტურდა, ის გვიან ღამით გადაყვანილი იქნა კლინიკაში,” – ამბობს გამყრელიძე.

მისი თქმით, გამოკვლეული და დადგენილია ასევე მისი შვილის ყველა კონტაქტი.

“თვითონ დაწერა ეს კონტაქტები, გაუგზავნა ეს კონტაქტები დაავადებათა კონტროლის ცენტრს და ამ კონტაქტების კვლევა ინტენსიურად მიმდინარეობს“, – განაცხადა გამყრელიძემ.

კიდევ ხუთ ადამიანს, რომლებიც ასევე ამ ადამიანთან ერთად იტალიაში იყვნენ, ასევე გამოვლინდა კორონავირუსი.

თვითიზოლაცია – აუცილებელი პირობა

ინფორმაციამ იმის შესახებ, რომ ვირუსის გამავრცელებელი აღმოჩნდა მედიკოსი, რომელმაც არ დაიცვა რეკომენდაცია და არ დარჩა თვითიზოლაციაში, განსაკუთრებული აღშფოთება გამოიწვია ფეისბუკზე.

ზოგი ითხოვს ჯარიმების და სანქციების შემოღებას მათთვის, ვინც არ დაემორჩილება წესს და ინფიცირებული ქვეყნიდან ჩამოსვლის შემდეგ იზოლაციის პირობებს არ დაიცავს.

დღევანდელ ბრიფინგზე ამირან გამყრელიძემ კიდევ ერთხელ აღნიშნა, რომ ყველა ადამიანი, ვინც ჩამოდის განსაკუთრებით ინფიცირებული რეგიონებიდან, თვითიზოლაციაში უნდა დარჩეს.

გამყრელიძემ ასევე თქვა, რომ არის შემთხვევები, როდესაც იტალიიდან მომავალი ადამიანები სიმპტომების ჩასაცხრობად და კარანტინში მოხვედრისგან თავის ასარიდებლად სიცხის დამწევ წამლებსაც სვამენ აეროპორტში.

“მე ყველას მოვუწოდებ ასე არ გააკეთონ. გამოიჩინეთ სამოქალაქო თვითშეგნება,” – თქვა გამყრელიძემ. 

ინფექციური საავადმყოფოს სამედიცინო დირექტორი მარინა ეზუგბაია ამბობს, რომ  ინფიცირებული 12 ადამიანიდან, ერთ-ერთის მდგომარეობა საშუალოზე მძიმე რჩება, სხვები ან მსუბუქი სიმპტომებით, ან უსიპტომოდ არიან.  ინფორმაციით, ახალი კორონავირუსით ინფიცირებული 10 პირიდან ერთ-ერთის მდგომარეობა კვლავ საშუალოზე მძიმეა.