არქივი- 12.02.2018

მიხეილ სააკაშვილი უკრაინიდან გააძევეს. ის ახლა პოლონეთშია

ჯემნიუსი

თბილისი

უკრაინის სპეცსამსახურებმა მიხეილ სააკაშვილი კიევში, ადგილობრივი დროით 14 საათსა და 45 წუთზე რესტორან “სულგუნში” სადილობის დროს დააკავეს.

რესტორანში სამხედრო ფორმაში ჩაცმული ადამიანები შევადნენ. როგორც თვითმხილველები ამბობენ, ისინი ოთხი მიკროავტობუსით იყვნენ.

დაკავებიდან რამდენიმე საათის განმავლობაში სააკაშვილის ადგილსამყოფელი უცნობი იყო. უკრაინის ხელისუფლების წარმომადგენლები კონკრეტულ განცხადებებს არ აკეთებდნენ.

მოგვიანებით, გაირკვა, რომ ოდესის ექს-გუბერნატორი და უკრაინის ოპოზიციური პარტიის “ახალ ძალთა მოძრაობის” ლიდერი კიევის ბორისპოლის აეროპორტისკენ წაიყვანეს, იქედან კი, კერძო თვითმფრინავით იგი პოლონეთში გაამგზავრეს.

უკრაინის სასაზღვრო სამსახურმა დაადასტურა, რომ სააკაშვილი იმ ქვეყანაში გადააგზავნეს, საიდანაც ის სექტემბერში უკრაინის ტერიტორიაზე შემოიჭრა.

ფაქტს ადასტურებს პოლონეთის სასაზღვრო სამსახურიც. პოლონური უწყების ოფიციალურ საიტზე გავრცელებულ განცხადებაში ნათქვამია, რომ პოლონეთმა საქართველოს ყოფილი პრეზიდენტი საკუთარ ტერიტორიაზე მიიღო:

“გადაწყვეტილების მიღებას საფუძვლად დაედო უკრაინის საიმიგრაციო სამსახურის მიერ წარმოდგენილი განცხადება რეადმისიის შესახებ. უკრაინული მხარის განცხადების განხილვისას თავისი როლი შეასრულა იმ ფაქტმაც, რომ მიხეილ სააკაშვილის მეუღლე ევროკავშირის ქვეყნის მოქალაქეა”, – ნათქვამია პოლონეთის სასაზღვრო სამსახურის განცხადებაში.

პოლონეთში ჩასვლისთანავე სააკაშვილს ტელეკომპანია რუსთავი 2-ი დაუკავშირდა.

“ეს არის უკიდურესი პანიკის გამოვლინება. არავისი არ ეშინიათ ისე, როგორც ჩემი”, – განაცხადა სააკაშვილმა რუსთავი 2-ისთვის მიცემულ ინტერვიუში.

მისი თქმით, კიევიდან ის იარაღის მუქარით გაიტაცეს.

სააკაშვილი ამბობს, რომ პოლონელები “თბილად დახვდნენ” – “ჩემს შესახვედრად მოვიდნენ პარლამენტარებიც, გამომიყვეს პოლონეთის სახელმწიფო დაცვა, ძალიან თბილად დამხვდნენ”, – განაცხადა სააკაშვილმა.

მისი თქმით, საქართველოში ის იმიტომ არ გამოაგზავნეს, რომ “ივანიშვილი არის მხდალი და ლაჩარი და რამის თავი რომ ჰქონოდა, ჩემს გადმოცემაზე მოელაპარაკებოდნენ პოროშენკოს”.

“მაგრამ ორივეს ეშინია ჩემი, როგორც ცეცხლის”, – განაცხადა სააკაშვილმა.

როგორ აპირებს მიხეილ სააკაშვილი პოლიტიკური ბრძოლის გაგრძელებას? ამ კითხვას სააკაშვილმა ასეთი პასუხი გასცა:

“ციხეში რომ ჩავესვით, იქედანაც ვიბრძოლებდით. ევროპაში გამომკეტეს, ევროპიდან ვიბრძოლებ. ეს არ არის პრობლემა თანამედროვე კომუნიკაციის პირობებში. მართლა ხომ არ ჰგონია ივანიშვილს და პოროშენკოს, რომ თავიდან მომიშორეს? ახლა იწყება თავდავიწყება. მე დავეხმარები ქართველ ხალხს და უკრაინელ ხალხს ამ ორი უბედურების და შავი ჭირისგან გათავისუფლებაში. ორივე ოლიგარქის ჩამოშორებაში [ივანიშვილის და პოროშენკოს] მე ვითამაშებ გადამწყვეტ როლს”, – განაცხადა სააკაშვილმა.