კადიროვი: ჩემი ქალიშვილები სკოლაში ჰიჯაბს არასდროს მოიხსნიან

ჩეჩნეთის მეთაურმა რუსეთის განათლებისა და მეცნიერების მინისტრი ოლგა ვასილიევა გააკრიტიკა მისი განცხდებისთვის სკოლებში ჰიჯაბის ტარების არამართებულობის თაობაზე. რმზან კადიროვის თქმით, იგი გაკვირვებულია მინისტრის პოზიციით, რომელიც მორდოვეთში მუსლიმური თავსაფრების ტარების აკრძალვას გაგებით მიუდგა.

„განცვიფრებას იწვევს, როდესაც მინისტრი, იმის ნაცვლად, რომ ადგილობრივ ხელმძღვანელობას [პოზიცია] შეუსწოროს, თავის „პირად მოსაზრებას“ ახვევს თავს მილიონობით მოქალაქეს. ჩემი სამი ქალიშვილი სკოლაში სწავლობს, ისინი ჰიჯაბს ატარებენ და საუკეთესო ნიშნები აქვთ. ოლგა ვასილიევა მოითხოვს, რომ თავსაფრები მოიხსნან? გოგონები ამას არსდროს  გააკეთებენ“, – დაწერა კადიროვმა „ინსტაგრამზე“.

მისი თქმით, რუსეთის კონსტიტუცია თითოეულ ადამიანს სინდისისა და აღმსარებლობის თავისუფლების გარანტიას აძლევს. თუმცა, „აშკარაა, რომ ეს მუხლი ყველა რუს ჩინოვნიკს არ აქვს წაკითხული“.

24 იანვარს განათლებისა და მეცნიერების მინისტრმა მორდოვეთში ჩასვლისას განახცხადა, რომ რუსეთის სკოლების მოსწავლეებმა საკუთარ აღმსარებლობას ატრიბუტიკის საშუალებით ხაზი არ უნდა გაუსვან. „არ მგონია, ჭეშმარიტი მორწმუნეები ცდილობდნენ, რომ რწმენისადმი თავიანთ დამოკიდებულებას ატრიბუტიკით გაუსვან ხაზი. ჩვენთან  საერო ხასიათის სწავლებაა“, – განაცხადა ვასილიევამ. მან ასევე აღნიშნა, რომ „საკითხი უკვე გადაწყვეტილია საკონსტიტუციო სასამართლოს მიერ“ და „ჰიჯაბის, როგორც ნაციონალური კუთვნილების აღმნიშვნელი ნივთის, ადგილი სკოლაში არ არის“.

კადიროვმა შეახსენა ვასილიევას, რომ რუსეთის ფედერაციის საკონსტიტუციო სასამართლოს ჰიჯაბების თაობაზე გადაწყვეტილება არ მიუღია.

სინამდვილეში, 2015 წლის თებერვალში რუსეთის უზენაესმა სასამართლომ რესპუბლიკის ხელისუფლების მიერ მორდოვეთის სკოლებში ჰიჯაბების და სხვა რელიგიური ატრიბუტიკის, ასევე მინი-კაბების, ჯინსების, ღრმადეკოლტეიანი სამოსისა და პირსინგის  ტარების აკრძალვა კანონიერად მიიჩნია.

ადრე, 2012 წელს სკოლებში ჰიჯაბების ტარების გარშემო კონფლიქტი  სტავროპოლის მხარეში წარმოიშვა – რამდენიმე რაიონში მუსლიმ გოგონებს სკოლაში ჰიჯაბით აღარ უშვებდნენ, რამაც მუსლიმთა აღშფოთება გამოიწვია. მაშინ კონფლიქტში პრეზიდენტი ვლადიმირ პუტინი ჩაერია, რომელმაც განაცხადა, რომ სკოლებში ჰიჯაბებით სიარულში კარგი არაფერია. მისი თქმით, რუსეთში, მუსლიმურ რაიონებშიც კი, ამგვარი ტრადიცია არასდროს ყოფილა.

კონფლიქტს შედეგად სტავროპოლის მხარის ყველა სკოლაში კლასიკური ყაიდის აუცილებელი სასკოლო ფორმის შემოღება მოჰყვა. მოსწავლეებს თავსაბურავების, მათ შორის ჰიჯაბების და რელიგიური სიმბოლიკის მქონე სამოსის ტარება ოფიციალურად აუკრძალეს.

2013 წლის ზაფხულში რუსეთის უზენაესმა სასამართლომ სტავროპოლის მხარის  საერთო-საგანმანათლებლო სკოლებში ჰიჯაბის ტარების აკრძალვა კანონიერად მიიჩნია.