ირანი: პრეზიდენტი- რეფორმატორი, რომელიც სამოქალაქო თავისუფლების მოწოდებებით გამოდის, ქვეყნის მეთაურად ხელახლა აირჩიეს
ჰასან როუჰანიმ ირანში საპრეზიდენტო არჩევნებში გაიმარჯვა და ქვეყნის ლიდერის რანგში მეორე ვადით შეუდგა მოვალეობის შესრულებას. ეს არჩევნები, ფაქტობრივად, რეფორმებისა და დასავლეთთან ურთიერთობის მოგვარების კურსისადმი ნდობის რეფერენდუმად იქცა.
როუჰანი 2013 წელს გახდა ირანის პრეზიდენტი და მისი მთავარი მესიჯი „მსოფლიოსთვის ირანის გახსნის“ გადაწყვეტილება იყო.
ჰასან როუჰანი. ფოტო EPA
არჩევნების შედეგების მიხედვით, 19 მაისს ჩატარებულ არჩევნებში როუჰანიმ 23,5 მილიონი ხმა მიიღო, რაც ხმათა დაახლოებით 57 პროცენტს შეადგენს. მისმა უშუალო კონკურენტმა ებრაჰიმ რაისლიმ 15.8 მილიონი ხმა მიიღო. ამის შესახებ ინფორმაცია დღეს ირანის შინაგან საქმეთა მინისტრმა გაავრცელა.
ამ არჩევნებმა მოსახლეობის უზარმაზარი ინტერესი გამოიწვია – საარჩევნო უბნებზე იმედენი ხალხი მივიდა, რომ უზარმაზარი რიგები დადგა და უბნების დაკეტვა დათქმულზე რამდენიმე საათით გვიან მოუხდათ.
წინასაარჩევნო კამპანიის დროს როუჰანი იმაზე ლაპარაკობდა, რომ ირანელი ხალხი სამოქალაქო თავისუფლებასა და ექსტრემიზმს შორის არჩევნის წინაშე დგას. ის აქტიურად აკრიტიკებდა რეფორმისტი ლიდერებისა და აქტივისტების დაპატიმრებების გაგრძელებას.
წინასაარჩევნო რბოლაში რიგით მეორე კანდიდატი – ებრაჰიმ რაისლი როუჰანის ეკონომიკის დანგრევაში ადანაშაულებდა, თავს ღარიბების დამცველად წარმოაჩენდა და დასავლეთის ქვეყნებთან ურთიერთობების გამკაცრების მოწოდებებით გამოდიოდა.
