აზერბაიჯანის საზოგადოებრივი ტელევიზიის ხელმძღვანელი ინტელექტუალური თამაშის მსოფლიო ჩემპიონი გახდა
ინტელექტუალური თამაშის „რა? სად? როდის?“ ჩემპიონი ბალაშ კასუმოვი საზოგადოებრივი ტელევიზიის (ITV) – ევროპის სამაუწყებლო კავშირში შემავალი, აზერბაიჯანის საინფორმაციო-გასართობი ტელეარხის გენერალური დირექტორი გახდა.
ცნობა:
აზერბაიჯანის İTV აზერბაიჯანულ ენაზე 2005წლიდან არსებობს და მთელი ქვეყნის ტერიტორიაზე მაუწყებლობს. აზერბაიჯანი სამხრეთი კავკასიის რესპუბლიკებიდან ბოლო რესპუბლიკაა, სადაც საზოგადოებრივი ტელევიზია გაჩნდა.აზერბაიჯანში საზოგადოებრივი ტელევიზიის შექმნის ერთ-ერთ წინაპირობად იქცა ევროპის საბჭოს პირობა, რომელშიც აზერბაიჯანი 2001 წელს გაწევრიანდა. იმ დროიდან ამ არხის ეთერში წინასაარჩევნო პროპაგანდის პერიოდში კანდიდატებისთვის გამოიყოფა თავისუფალი საეთერო დრო. ბევრი კანდიდატისთვის ეს ერთადერთი შანსია, რომ საკუთარი პროგრამა ამომრჩევლამდე მიიტანოს, რადგან ოპოზიციის წარმომადგენლებისთვის სხვა არხებზე მოხვედრა თითქმის წარმოუდგენელია.
კასუმოვის დანიშვნის შესახებ სიახლე პირველად ჯერ კიდევ ერთი თვის წინათ გაჩნდა და სოციალურ ქსელებში მაშინვე მწვავე განხილვის საგნად იქცა. ძირითადად იმიტომ, რომ ბალაშ კასუმოვი – ცნობილი პირია, ინტელექტუალი და ერუდიტი, და ამიტომ ბევრი მიიჩნევს, რომ მისი ხელმძღვანელობით İTV გაცილებით უკეთესი გახდება.
აი, რას ამბობდნენ მომხმარებლები ამის შესახებ:
„მიხარია ბალაშის ამბავი, ახლა İTV-ის ყურებას დავიწყებ“;
„იმედი გაჩნდა, რომ ერთი კარგი არხი მაინც გვექნება. წარმატებები ახალ დირექტორს!“
„წარმატებები მას, მაღალი ინტელექტის ადამიანს, რასაკვირველია, ყველაფერს გაუმკლავდება“.
სხვები ამ ოპტიმიზმს არ იზიარებდნენ, ამბობდნენ, რომ ახალი დირექტორი – მხოლოდ ფორმალობაა, რაც ტელეარხზე არანაირად არ აისახება:
„რა შეიძლება შეიცვალოს მისი ხელმძღვანელობის დროს? ეს თავიდან ბოლომდე არხი-ცენზურაა, და ნუთუ ინტელექტუალებს შეუძლიათ იმის ატანა, როდესაც მათ ფიბრებს შეკუმშვის და გაშლის საშუალებას სრულად არ აძლევენ?“
ამ გაცხარებული კამათის დროს ჟურნალისტებმა ყურადღება მიაქციეს იმას, რომ ტელეარხის გენდირექტორს, საერთოდაც, კი არ ნიშნავენ, არამედ ირჩევენ. ანუ, წესით, სამაუწყებლო საბჭომ, ექვს კაცზე არანაკლები შემადგენლობით, კენჭისყრა უნდა გამართოს თითოეულ იმ კანდიდატზე, რომელიც 10 დღის განმავლობაში საკუთარი თავის შესახებ განაცხადებს. მოცემულ შემთხვევაში, ეს პროცედურა ლამის უგულებელყვეს – კასუმოვს ყველანაირი კენჭისყრის (რომლის აუცილებლობაზე უმრავლესობას ეჭვიც კი არ ჰქონდა) გარეშე უკვე ულოცავდნენ. საბოლოოდ, მთელი ერთი კვირის თავზე, კენჭისყრა მაინც ჩატარდა. ბალაშ კასუმოვმა, როგორც სავსებით მოსალოდნელი იყო, გაიმარჯვა და 1 ივნისიდან ოფიციალურად და კანონიერად ხელმძღვანელობს İTV-ის.
არსებობს კიდევ ერთი ირიბი მიზეზი, რის გამოც ამ მოვლენამ ამდენი ყურადღება მიიქცია. ბალაშ კასუმოვი „რა? სად? როდის?“ უკვე მეორე მოთამაშეა, რომელმაც ხელმძღვანელი სახელმწიფო თანამდებობა დაიკავა. მანამდე ჩინოვნიკის კარიერის გაკეთება მოასწრო მიკაილ ჯაბაროვმა, რომელიც ჯერ განათლების სამინისტროს ხელმძღვანელობდა, ახლახან კი გადასახადების მინისტრი გახდა. ასე რომ, სოციალურ ქსელებში ეს მალევე იქცა ხუმრობის მიზეზად. სხვათა შორის, მიკაილ ჯაბაროვი და ბალაშ კასუმოვი – ბიძაშვილები არიან.
რაც შეეხება İTV -ის წინა გენერალურ დირექტორს ჯამილ გულიევს, ჯერ ამბობდნენ, თითქოს მან თანამდებობა „ევროვიზიის“ კონკურსზე აზერბაიჯანის ჩაფლავების გამო დაკარგა. ყოველწლიურად სწორედ İTV ირჩევს ამ კონკურსისთვის მონაწილესა და სიმღერას, და მის ტრანსლირებასაც თავად ახდენს. წელს აზერბაიჯანის წარმომადგენელი კონკურსის ფინალში ვერ მოხვდა და ბევრი ამაში სწორედ არხის ხელმძღვანელობას ადანაშაულებდა. ჯამილ გულიევი ამის შემდეგ მალევე გადადგა. ოფიციალური ვერსიით – ჯანმრთელობასთან დაკავშირებული პრობლემების გამო.
ბალაშ კასუმოვმა უკვე მოასწრო არხზე მოსალოდნელი საკადრო რეფორმების დაანონსება.
ბალაკიში (ბალაშ) კასუმოვი 1978 წლის 20 ოქტომბერს ბაქოში დაიბადა. მან აზერბაიჯანის სახელმწიფო ეკონომიკური უნივერსიტეტი დაამთავრა. ის საპროდუსერო ცენტრ GameTV.az-ს ხელმძღვანელობს, არის „რა?სად? როდის?“ ერთ-ერთი ყველაზე ცნობილი და წარმატებული მოთამაშე აზერბაიჯანიდან.
