ინგუშეთის სამხედრო პოლიციის ბატალიონი სირიაში გაემგზავრა

სამხედრო პოლიციის ბატალიონი ინგუშეთიდან სირიაში გაემგზავრა. ამის შესახებ 13 თებერვალს ინგუშეთის ხელმძღვანელმა იუნუს-ბეკ ევკუროვმა განაცხადა.

„ჩვენგან რესპუბლიკის მცხოვრებთაგან შექმნილი სამხედრო პოლიციის ბატალიონი  გაემგზავრა სირიის იმ დასახლებულ პუნქტებსა და ქალაქებში სამუშაოდ, სადაც მხარეები დაშორიშორებულები არიან და ხელმოწერილია სამშვიდობო შეთანხმებები“,- თქვა ევკუროვმა.

მან განმარტა, რომ ინგუშეთიდან სირიაში  ბატალიონი სამშვიდობო მისიით გაიგზავნა – რუსული ავიაჯგუფისა და მოწინააღმდეგე მხარეების შემრიგებელი ცენტრის თანამშრომლების უსაფრთხოების უზრუნველსაყოფად. „დარწმუნებული ვარ, რომ ჩვენი ბიჭები ღირსეულად შეასრულებენ უმაღლესი მთავარსარდლის, თვდაცვის მინისტრის მიერ დაკისრებულ ამოცანებს“, – განაცხადა ევკუროვმა.

როგორც რუსული სააგენტოები ძალოვანი სტრუქტურების წყაროებზე დაყრდნობით იუწყებიან, ინგუშეთიდან ჩასული ბატალიონი სირიაში შეცვლის ჩეჩენ სამხედრო მოსამსახურეებს, რომლებიც ამჟამად ხმეიმიმის სამხედრო ბაზის და სხვა ობიექტების დაცვაში არიან ჩართულები. წყაროები ირწმუნებიან, რომ ჩეჩნეთის სამხედრო პოლიციიის ბატალიონი სირიაში გასული წლის დეკემბრიდან იმყოფება.

ჩეჩნეთის შინაგან საქმეთა სამინისტროს თანამშრომლებისგან სირიაში გასამგზავრებლად ორი ბატალიონის შექმნის შესახებ ცნობილი გახდა გასული წლის დეკემბერში „ნოვაია გაზეტაში“  გამოქვეყნებული პუბლიკაციიდან. ჩეჩნეთის ხელმძღვანელმა რამზან კადიროვმა სირიაში ჩეჩენი სამხედროების ყოფნის ფაქტი ოფიციალურად მხოლოდ იანვრის ბოლოს დაადასტურა.

რუსეთი სირიაში  სამთავრობო ძალების – პრეზიდენტ ბაშარ ასადის მომხრეთა მხარდამჭერ სამხედრო ოპერაციას 2015 წლის სექტემბრიდან  ახორციელებს. ოპერაციას რუსეთის ფედერაციის საჰაერო-კოსმოსური ძალები ატარებენ. სახმელეთო ქვედანაყოფები, ძირითადად, ბაზების დაცვაში არინ ჩართულები.