თურქეთი აღმოსავლეთ იერუსალიმში საელჩოს გახსნის

თურქეთის პრეზიდენტმა რეჯეპ ერდოღანმა  აღმოსავლეთი იერუსალიმის ტერიტორიაზე საელჩოს გახსნის გეგმის შეასახებ განაცხადა. მან ეს ერთ-ერთ თურქულ პროვინციაში მმართველი პარტიისადმი „სამართლიანობა და განვითარება“ მიმართვისას გააკეთა, – იუწყება Reuters.

“ჩვენ უკვე გამოვაცხადეთ აღმოსავლეთი იერუსალიმი პალესტინის სახელმწიფოს დედაქალაქად, მაგრამ იქ ჩვენი საელჩოს გახსნა ვერ შევძელით, რადგან იერუსალიმი ამჟამად ოკუპირებულია“, – განაცხადა ერდოღანმა.

1967 წლიდან იერუსალიმი მთლიანად კონტროლდება ისრაელის მიერ, რომელსაც ეს ქალაქი თავის დედაქალაქად მიაჩნია. გაერო ამას არ ცნობს და აღმოსავლეთი იერუსალიმი ოკუპირებულ ტერიტორიად მიაჩნია.

კონფლიქტი ისრაელის ირგვლივ, რომელიც უკვე 50 წელიწადია გრძელდება, ისევ აქტიურ ფაზაში შევიდა მას შემდეგ, რაც დეკემბრის დასაწყისში ამერიკის პრეზიდენტმა დონალდ ტრამპმა განაცხადა, რომ სურს, აშშ-ის საელჩოს თელ-ავივიდან იერუსალიმში გადაიტანოს, და ამით იერუსალიმი ისრაელის ტერიტორიად ცნო.

გუშინდელ განცხადებაში ერდოღანმა რამდენჯერმე აღნიშნა, რომ ტრამპის გადაწყვეტილებას სიონისტურად მიიჩნევს.

რამდენიმე დღის წინ ისლამური თანამშრომლობის ორგანიზაციის რიგგარეშე სამიტზე აღმოსავლეთი იერუსალიმის სტატუსის თაობაზე იმსჯელეს. ორგანიზაციამ აღმოსავლეთი იერუსალიმი პალესტინის სახელმწიფოს დედაქალაქად ცნო, რეჯეპ ერდოღანმა კი, რომელიც სამიტზე სიტყვით გამოვიდა, ისრაელს ტერორისტული სახელმწიფო უწოდა. ისლამური თანამშრომლობის ორგანიზაციაში გაწევრიანებულია 57 ქვეყანა, მათ შორის – აზერბაიჯანი.