თბილისში დემირელის სახელობის კოლეჯი დაიხურა

ფოტო: “რადიო თავისუფლება”  

საქართველოს განათლების და მეცნიერების სამინისტრომ მიიღო გადაწყვეტილება, დახუროს სულეიმან დემირელის სახელობის სკოლა, რომელიც თბილისში 1993 წლიდან ფუნქციონირებს.

სკოლა სასწავლო პროცესის დაწყებამდე 16 დღით ადრე დაიხურა, რაც იმას ნიშნავს, რომ დემირელის კოლეჯის მოსწავლეებს ორ კვირაში ახალი სასწავლებლის მოძებნა მოუწევთ.

სკოლის დახურვის ოფიციალური მიზეზი განათლების სამინისტროში აცხადებენ, რომ სკოლის დახურვის მიზეზი სკოლის მუშაობაში აღმოჩენილი კონკრეტული ხარვეზევია. საუბარია, თაღლითობის ნიშნებზეც.

როგორც „ინტერპრესნიუსს“ განათლების სამინისტროს სკოლების ავტორიზაციის სახელმწიფო კომისიის თავმჯდომარის მოადგილე გია მურღულიამ განუცხადა, დემირელის სკოლას 3 მიმართულებით ჰქონდა პრობლემა, რის გამოც სკოლას ლიცენზია არ გაუგრძელეს. მათ შორის, მურღულიას თქმით, ყველაზე მწვავე იყო ამ სკოლის დამოკიდებულება უცხო ქვეყნის მოქალაქეების მიმართ. კერძოდ, გია მურღულიას განცხადებით, ერაყიდან თუ ირანიდან ჩამოსულ მოსწავლეებს ხშირად ერთ დღეში შეეძლო სხვადასხვა გამოცდის ჩაბარება, რაც წარმოუდგენელია.

„უცხო ქვეყნის მოქალაქეებს ზოგჯერ ერთ დღეში მიიღებდნენ სკოლაში, შექმნიდნენ ინდივიდუალურ სასწავლო გეგმას. მოსწავლეები ერთ დღეში 6-7 გამოცდას ჩააბარებდნენ როგორც ქართულ ენასა და ლიტერატურაში, ასევე ფიზიკასა და ქიმიაში, ისტორიასა და ბიოლოგიაში. ეს არის ენით გაუგონარი და უთქმელი დარღვევა, გარდა ამისა, ნამდვილად ახლავს ამას თაღლითობის ნიშნები“, – განაცხადა გია მურღულიამ.

დ ემირელის სახელობის კოლეჯი უკვე რამდენიმე თვეა სკანდალშია გახვეული. 24 მაისს, მას შემდეგ, რაც საქართველოში თურქეთის პრემიერ-მინისტრი ბინალი ილდირიმი სტუმრობდა, ქართველმა სამართალდამცავებმა დემირელის კოლეჯის მმართველი ემრე ჩაბუქი დააკავეს. თურქული მხარე ჩაბუქის თურქეთში ექსტრადირებას ითხოვს.

მიუხედავად იმისა, რომ დემირელის კოლეჯის მესვეურები კატეგორიულად უარყოფენ სკოლის კავშირს თურქ ოპოზიციონერთან ფეთჰულა გიულენთან, ამ სკოლის ამბავი სწორედ გიულენის წინააღმდეგ აგორებული კამპანიის ჭრილში განიხილება.

მას შემდეგ, რაც თურქეთის პრეზიდენტის რეჯეპ ტაიპ ერდოღანის ყოფილი მოკავშირე, ყოფილი იმამი ფეთჰულა გიულენი გასული წლის ბოლოს თურქეთში გადატრიალების მოწყობაში დაადანაშაულეს, ანკარა მის მომხრეებს სასტიკად დევნის. გიულენის ორგანიზაცია თურქეთში ტერორისტულ ორგანიზაციად გამოცხადდა. თურქეთის ხელისუფლებამ გიულენის ყველა სასწავლებელი დახურა (გიულენის პატრონობით მთელი მსოფლიოს მასშტაბით ათასობით სასწავლებელია გახსნილი) და მისი მომხრე ათასობით ადამიანი დააკავა. იგივეს თხოვს ერდოღანი მეგობარ ქვეყნებსაც.

ამდენად, ჩაბუქის დაკავებაში, ისევე როგორც დემირელის სკოლის დახურვაში, ქართველი ექსპერტები ანკარის მხრიდან თბილისზე ზეწოლის კვალს ხედავენ.

დემირელის კოლეჯი ერთადერთი სასწავლებელი არ არის, რომელსაც საქართველოში გიულენთან შესაძლო კავშირის გამო პრობლემები შეექმნა. მანამდე, საქართველოს განათლების სამინისტრომ ბათუმში შაჰინის სახელობის სკოლას შეუჩერა ლიცენზია.