თბილისი მერს ოქტომბრის ბოლოს აირჩევს. სავარაუდო კანდიდატებს შორის კანადელი შერიფიც კი არის

საქართველოს პრეზიდენტმა გიორგი მარგველაშვილმა ადგილობრივი თვითმართველობის არჩევნების სავარაუდო თარიღი დანიშნა. არჩევნები ოქტომბრის მესამე კვირის ბოლოს გაიმართება.

ზუსტი თარიღი მხოლოდ აგვისტოში გამოაცხადდება – მას ქვეყნის პრეზიდენტი  პრემიერ-მინისტრთან შეთანხმებით განსაზღვრავს.

არჩევნების სავარაუდო თარიღის დანიშვნა პრეზიდენტმა იმით ახსნა, რომ პოლიტიკურ პარტიებს შესაძლებლობა ექნებათ კალენდარი და საარჩევნო კამპანიის ბიუჯეტი სათანადოდ დაგეგმონ.

ოქტომბერში საქართველოს მოქალაქეები თბილისის მერს და კიდევ 11 ქალაქის და რაიონის ხელმძღვანელებს აირჩევენ. პარალელურად, ადგილობრივი თვითმართველობის – საკრებულოს სათათბირო ორგანოებშიც ჩატარდება არჩევნები.

წესების თანახმად, წინასაარჩევნო კამპანია შეიძლება არჩევნებამდე 60 დღით ადრე დაიწყოს.

ორმა პარტიამ უკვე ოფიციალურად წარმოადგინა კანდიდატები დედაქალაქის მერის თანამდებობაზე.

პირველმა, ჯერ კიდევ მაისში, „ევროპულმა საქართველომ“  გააკეთა განცხადი (ესენი არიან სააკაშვილის ყოფილი თანაგუნდელები, რომლებმაც 2017 წლის იანვარში დატოვეს ექს-პრეზიდენტის პარტია). „ევროპული საქართველოდან“ კანდიდატი გახდა ელენე ხოშტარია – მიხეილ სააკაშვილის ხელისუფლებაში ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის ყოფილი მოადგილე.

გუშინ თავისი კანდიდატი სააკაშვილის პარტიამ „ერთიანმა ნაციონალურმა მოძრაობამაც“ წარადგინა. ეს არის ტელეკომპანია „რუსთავი 2“-ის წამყვანი ზაალ უდუმაშვილი. ის პოლიტიკაში ახალბედაა, თუმცა 25-წლიანი სატელევიზიო კარიერის წყალობით, საქართველოში კარგად იცნობენ.