თბილისის მთავარი ნაძვის ხე "ქართული ოცნების" პარტიული სლოგანით მორთეს

თბილისში, თავისუფლების მოედანზე უკვე დაიწყო საახალწლო ნაძვის ხის მონტაჟი.

ნაძვის ხე ახალი არ არის – ისევე როგორც წინა წლებში, ამჯერადაც  ქალაქის მთავარი საახალწლო ატრიბუტი წმინდა გიორგის მონუმენტის გარშემო აღმართული კონსტრუქცია იქნება. თუმცა, სიახლე თბილისელებისთვის დეკორაცია აღმოჩნდა – ნაძვის ხის გარშემო შემოვლებულ მესერზე ახლადარჩეულმა მერმა კახი კალაძემ თავისი წინასაარჩევნო სლოგანის განთავსება გადაწყვიტა. წარწერა “სიცოცხლით სავსე ქალაქი” ნაძვის ხის გარშემო  ორ ენაზე ქართულად და ინგლისურად იციმციმებს.

თბილისის მერიის პრესსამსახურის უფროსმა On.ge-სთან საუბარში განმარტა, რომ ეს არ არის რაიმე ოფიციალური სლოგანი, არამედ კახა კალაძის წინასაარჩევნო დაპირება:

“ბუნებრივია, ის ყოველთვის გამოიყენებს ამ დაპირებას რეალიზების ნაწილში. მე იმედი მაქვს, რომ ეს მართლა ასე იქნება. ამიტომ, ალბათ ბევრჯერ შეგხვდებათ ეს სიტყვა მერის ოფიციალურ ტექსტებში”.

ნაძვის ხის ფოტო უკვე იქცა ფეისბუკ-ჰიტად.

“მსოფლიოში ალბათ პირველი ქვეყანა ვართ, რომელიც ნაძვისხეებს პარტიული ლოზუნგებით რთავს. და ეს ნაძვისხე რომელიმე პოლიტიკური პარტიის ოფისთან კი არ დგას, არამედ ქალაქის მთავარ მოედანზე,” – წერს ერთ-ერთი ფეისბუკ-მომხმარებელი.