ვლადიკავკაზში სკოლის მოსწავლეს სოციალურ ქსელში კომენტარის გამო დევნიან

პოლიციის თანამშრომლები ვლადიკავკაზის ერთ-ერთი სკოლის მოსწავლის სახლში მივიდნენ. ამის მიზეზი გახდა კომენტარი, რომელიც მოზარდმა სოციალურ ქსელში დატოვა.

იმ პოსტის ქვეშ, სადაც ვლადიკავკაზელებს 12 ივნისს ქალაქში კორუფციის წინააღმდეგ აქციის გამართვისკენ მოუწოდებდნენ, მოზარდმა დაწერა: «მაგარია, უნდა წავიდეთ». სწორედ ეს სამი სიტყვა გახდა ადგილობრივი სამართალდამცველების აღელვების მიზეზი.

ექსტრემიზმთან ბრძოლის განყოფილების თანამშრომლებმა მშობლებს შვილის მობილური ტელეფონი ჩამოართვეს. მოზარდს კი მოსთხოვეს სოციალურ ქსელში გაკეთებული კომენტარი წაეშალა და დაეწერა, რომ აქციაზე წასვლას არ აპირებს.

მოზარდმა ამ დავალების შესრულებაზე უარი თქვა, რადგან მისი თქმით, მსგავსი რამ მის პრინციპებს ეწინააღმდეგებოდა.

ამის შემდეგ პოლიციელებმა ის დედასთან ერთად პოლიციის განყოფილებაში მიიყვანეს და გააფრთხილეს, რომ ამიერიდან ის სპეციალური სამსახურების კონტროლის ქვეშ იქნება.

12 ივნისის მიტინგების ორგანიზატორი რუსი ოპოზიციონერი ალექსეი ნავალნია. ის მოუწოდებს რუსეთის მოქალაქეებს, თავიანთ ქალაქებში კორუფციის წინააღმდეგ აქციები მოაწყონ.

ნავალნიმ თავის ბლოგზე დაწერა, რომ ამაყობს ვლადიკავკაზელი მოზარდით, «რომელმაც უარი თქვა კომენტარის წაშლაზე, რადგან ეს მის პრინციპებს ეწინააღმდეგებოდა».