ვახტანგ გომელაური: სპეცოპერაციის დროს ლიკვიდირებულთა შორის, შესაძლოა აჰმედ ჩატაევიც არის

სახელმწიფო უსაფრთხოების სამსახურის ხელმძღვანელმა ვახტანგ გომელაურმა განაცხადა, რომ შესაძლოა, გაბრიელ სალოსის ქუჩაზე სპეცოპერაციისას დახოცილ სამ პიროვნებას შორის, ერთ-ერთი სწორედ აჰმედ ჩატაევი იყოს.

„ეჭვი არის, რომ ეს ადამიანიც შეიძლება იყოს. თუმცა, ეს დადასტურდება ექსპერტიზის შემდეგ, როცა გაკეთდება დნმ-ის ანალიზი და გვექნება ზუსტი პასუხი, იყო ჩატაევი თუ არ იყო“ – ამის შესახებ გომელაურმა ჟურნალისტებს სპეცოპერაციის დროს დაღუპული სპეცრაზმელის სამოქალაქო პანაშვიდის შემდეგ განუცხადა.

მან ასევე აღნიშნა, რომ გამოძიებაში ჩაერთო ამერიკული მხარეც, რომელსაც უფრო გამოცდილი სამსახურები ჰყავს – „გამოძიების ინტერესებიდან გამომდინარე ახალ დეტალებზე ჯერ ვერ ვისაუბრებ. თუმცა, შემიძლია ვთქვა, რომ გამოძიებაში ჩაერთო ჩვენი სტრატეგიული პარტნიორი – ამერიკული მხარე, შესაბამისი სამსახურებით. მათ ჩვენზე გამოცდილი სამსახურები ჰყავთ. საექსპერტო მიმართულებითაც და საგამოძიებო მიმართულებითაც და ერთობლივად ვატარებთ საგამოძიებო სამუშაოებს“.

მისივე თქმით, მათ გააჩნდათ გარკვეული ოპერატიული ინფორმაცია, რომლის მიხედვითაც – “ეს ჯგუფი მასშტაბურ ღონისძიებებს გეგმავდა”.